Hues: Relacionnan sexual di Maxwell cu adultonan por keda secreto

Testimonio di ex-pareha di Jeffrey Epstein tocante su experiencianan sexual cu adultonan cu a duna permiso por keda secreto na momento cu revela un transcripcion proximo siman, un hues a bisa diamars.

E veredicto di hues Loretta A. Preska na Manhattan tabata referi na un deposicion na juli 2016 di Ghislaine Maxwell den un demanda civil presenta pa un di e acusadornan di Maxwell, cu a resolve desde e tempo ey.

“Maske e interes lascivo di algun por keda sin satisfaccion como resultado, e interes di Maxwell pa tene priva e detayenan di su relacionnan sexual cu adultonan cu a duna permiso ta merece pa seya e porcionnan ey di su testimonio”, Preska a bisa na e audiencia conduci electronicamente pa motibo di coronavirus.

Abogadonan pa e Britanico di 59 aña di edad tabatin obhecion pa haci e transcripcion publico a base cu e por daña su oportunidad pa un huicio husto pa cargonan cu el a recluta tres mucha muhe menor di edad den añanan 1990 pa Epstein.

Preska a bisa cu abogadonan di Maxwell a faya di mustra con revela e transcripcion di deposicion lo por den peliger un huicio cu no ta programa pa cuminsa te na juli, of pakico publicidad di e documento no por ser surpasa pa un proceso husto di seleccion di hurado.

E hues tambe a duna orden pa libera den ocho dia decenas di otro documento busca pa e Miami Herald.

Epstein, un financiero rico y ofensor sexual condena, a comete suicidio na un prison na Manhattan na 2019 mientras e tabata spera su huicio pa traficacion sexual.

Maxwell, ken ta deteni sin fiansa na un prison federal na Brooklyn, a declara su mes inocente di cargonan cu el a recluta hobennan pa Epstein y algun biaha a join den nan abuso.

E audiencia diamars tabata interumpi brevemente na momento cu a bisa e hues cu audio di e procedura tabata siendo transmiti online. “Esun cu ta haciendo esey, bo ta operando contra ley. Mi ta sospecha di un forma di haya sa. Pues mi ta bay pidi bo, cu hopi respet, pa stop di hacie. Nos tin suficiente falta di estado di derecho akinan. Ban purba di observ’e”, Preska a bisa.

E audio tabata online riba un pagina cu a inclui comentarionan di individuonan cu tabata parce di acepta QAnon, un teoria di conspiracion di ultra-derecha.