(AP) —E reto di California contra e despliegue militar di e administracion di Trump na Los Angeles a bolbe na un corte federal den San Francisco diabierna pa un audiencia corto, despues cu un corte di apelacion a duna presidente Donald Trump un victoria procedural importante.
Hues federal Charles Breyer a dicidi pa no emiti ningun decision adicional ainda, y en cambio a pidi pa ambos partido entrega resumennan cu argumentonan pa dialuna merdia, pa determina si e Ley di Posse Comitatus — cu ta prohibi trupanan di conduci aplicacion di ley riba nivel civil riba teritorio Mericano — ta ser viola na Los Angeles.
E audiencia a tuma lugar un dia despues cu panel di apelacion di e di nuebe Circuito a permiti e presidente mantene control riba e trupanan di e Guardia Nacional cu el a manda na e ciudad como reaccion na e manifestacionnan contra redadanan di inmigracion.
Gobernador di California, Gavin Newsom, a alega den su demanda cu “violacion di e Ley di Posse Comitatus ta inminente, si no ya den curso,” pero Breyer a posponi di trata e acusacion esey siman pasa.
Trupanan di Guardia Nacional a acompaña agentenan federal den cierto redadanan di inmigracion, y e Mariniernan a detene un persona riba e prome dia cu nan a ser desplega pa proteha un edificio federal. E incidente a representa e prome biaha cu trupanan federal a detene un ciudadano desde cu nan a yega na e segunda ciudad mas grandi di e pais.
Trump por keda cu control riba e Guardia Nacional
Hues Breyer a conclui cu Trump a actua ilegalmente ora cu, a pesar di oposicion di gobernador di California, el a activa e soldadnan. Pero, e corte di apelacion a suspende e orden temporal di Breyer. Diahuebs, Breyer a pidi abogadonan pa presenta argumentonan pa determina si e of e corte di apelacion tin hurisdiccion pa impone un prohibicion bou di e Ley di Posse Comitatus.
California ta busca un orden provisional pa duna Newsom back control riba e trupanan na Los Angeles, unda e protestanan a calma den e ultimo dianan.
Trump, un Republicano, ta defende cu e trupanan tabata necesario pa restaura orden. Newsom, un Democrata, ta alega cu su presencia den e ciudad Mericano a stimula tension, a kita poder di autoridad local, y a malgasta recurso.
Alcalde di Los Angeles a kita toque de queda
Ta parce cu e manifestacionnan ta calmando, aunke e dia prome cu agentenan federal a reuni den e parkinglot di Dodger Stadium, decenas manifestantenan a presenta. Los Angeles Dodgers a pidi nan pa sali, y nan a cumpli.
Diamars, Alcalde Karen Bass a kita e toque de queda den e centro di ciudad, cual tabata implementa despues di vandalismo y enfrentamento cu polis durante protestanan contra e detencionnan di inmigrantenan.
Trump a federalisa miembronan di e Guardia Nacional na California bou autoridad yama ‘Title 10.’
Title 10 ta duna e presidente derecho pa manda e Guardia Nacional den servicio federal ora cu e pais ta “ser invadi,” ora tin “rebelion of peligro di rebelion contra e gobierno,” of ora cu e presidente no por “ehecuta ley di Merca.”
Breyer a dicta cu Trump a surpasa su autoridad legal, cual ta limita pa uso den casonan di “rebelion of peligro di rebelion.”
“E protestanan na Los Angeles no a yega na nivel di ‘rebelion,’” Breyer a skirbi, un ex-fiscal di Watergate, nombra pa presidente Bill Clinton y ken ta ruman homber di ex-huez di e Corte Supremo Stephen Breyer.
Trupanan a keda bou control federal mientras e pleito ta sigui
E administracion di Trump a argumenta cu e corte no por cuestiona decisionnan di e presidente. Pero e panel di apelacion a rechasa esey, indicando cu presidentenan no tin poder absoluto pa tuma control di e Guardia Nacional di un estado. Aunke, den e caso aki, nan ta considera cu Trump a presenta suficiente evidencia pa defende su motibo pa federalisa e trupanan.
Pa awor, e Guardia Nacional na California lo keda bou di encargo federal mientras cu e pleito legal ta sigui. Esaki ta e prome biaha cu un presidente a desplega trupanan di un estado sin permiso di su gobernador desde 1965, ora trupanan a ser manda pa proteha marchadornan di e movemento pa Derechonan Civil.
Trump a celebra e decision di apelacion den un publica riba red social, yamando esaki un “VICTORIA GRANDI” y tirando hint mas despliegue den futuro.
Newsom a adverti cu California no lo ta e unico estado cu lo mira trupanan riba caya si Trump logra su intencion. Mientras tanto, vicepresidente JD Vance tabata na caminda pa Los Angeles diabierna pa reuni cu e Mariniernan cu tambe a ser desplega pa proteha edificionan federal. Vance mes ta un ex-Marinier.
