(AP) — Un hues federal na Oklahoma riba dialuna a pone dia 28 di januari proximo como fecha pa e sentencia nobo di Joe Exotic, conoci pa e serie ‘Tiger King’.
Hues di districto Mericano, Scott Palk a pone e sentencia pa 10am y a otorga e solicitud di e acusado pa keda transporta na Oklahoma City pa e audiencia.
Un corte federal di apelacion na juli a duna veredicto cu Joe Exotic, kende su nomber real ta Joseph Maldonado-Passage, mester ricibi un sentencia mas cortico. Corte di Apelacion Mericano pa di 10 circuito na Denver a determina cu e corte di huicio eroneamente a trata dos condena di asesinato a sueldo separadamente na momento di calcula su sentencia di prison.
Na januari 2020 a sentencia Maldonado-Passage cu 22 aña di prison. Pero e corte di apelacion a bisa cu e corte mester a calcula su rango di sentencia entre 17 aña y mey y tiki menos di 22 aña den prison, na lugar di entre menos di 22 aña y 27 aña den prison.
Maldonado-Passage, kende ta insisti riba su inocencia, tambe a keda sentencia pa asesinato di cinco tiger, bende tiger baby, y falsifica documentonan di bida salvahe.
Luna pasa, abogadonan pa e ex-cuidador di bestia di Oklahoma a bisa cu e tabata retrasando tratamento pa cancer te despues di su sentencia. Maldonado-Passage a anuncia na november cu e tin cancer di prostaat, y a transferi e for di un centro medico federal na Fort Worth, texas, na un centro medico federal na Butner, North Carolina.
Den un accion separa, un pareha cu a bira sucesor di Maldonado-Passage den opera e Greater Wynnewood Exotic Animal Park y Tiger King Park a bay di acuerdo pa entrega nan derecho na 97 animal di especienan menasa of den peliger, y 47 otro animal cubri pa e Ley di Bienestar Animal.
Jeffrey y Lauren Lowe, kende ta ex-amigo di Maldonado-Passage, tambe a bay di acuerdo den un declaracion di permiso dia 23 di december entrega den corte federal na Muskogee, Oklahoma, pa nunca mas exhibi animalnan.
Agentenan federal a confisca 97 animal den peliger, incluyendo 68 ‘big cat’ y un jaguar, for di Tiger King Park na Thackerville, Oklahoma, den dos inval mei y augustus ultimo. Oficialnan federal ta acusa e pareha Lowe di haci daño y acosa e animalnan.
