Un hues federal a pospone un cancelacion di e app popular TikTok cual presidente Donald Trump a menasa cune, dunando rason na un comediante di Pennsylvania y otro dos creadornan di TikTok kende ta bisa cu e orden di Trump ta afecta nan expresion liber.

Hues Wendy Beetlestone diabierna a blokea un accion proximo di Departamento di Comercdio cu efectivamente lo a prohibi TikTok na Merca door di elimina esaki di servicionan tecnico vital.

E administracion di Trump a bisa cu TikTok ta un menasa pa seguridad, citando su doño Chines, ByteDance, y e posibilidad cu gobierno Chines lo por spiona riba usuarionan. E orden ehecutivo di Trump tabata programa pa drenta na vigor dia 12 di november proximo, pero awo ta para mientras e demanda ta procede.

Esaki no ta e prome reto legal na e intento di Trump pa controla TikTok. Otro hues federal na september a pospone un orden di administracion di Trump cu lo a prohibi TikTok for di tiendanan di app pa smartphone. Den e caso ey, abogadonan di TikTok a argumenta cu e prohibicion di e administracion lo ta contra derechonan di Prome Amienda y haci daño ireparabel na e compania.

Pero e caso di Beetlestone den Disctricto Oriental di Pennsylvania a ser treci dilanti no pa e compania, sino tres di su usuarionan kende a amasa siguidonan riba e app: Douglas Marland, un comediante di Bucks County na Pennsylvania; hunto cu diseñador di moda basa na Sur California, Cosette Rinab; y un musico di Connecticut, Alec Chambers.

“Nos ta complaci cu e hues a stop e prohibicion aki, cu ta excede e autoridad di e presidente bao e International Emergency Economic Powers Act, esta porcionnan di e Acta cu ta refleha e compromiso profundo di nos pais pa cu libertad di expresion”, segun nan abogado, Ambika Kumar Doran, a bisa den un declaracion.

Departamento di Comercio y Cas Blanco no a duna comentario inmediato. E administracion a bisa cu ta ehecutando e autoridad di emergencia di Trump bao un ley di 1977 habilitando e presidente pa regula comercio internacional pa adresa menasanan inusual.

TikTok a bisa den un declaracion diabierna cu ta ‘profundamente conmovi pa e cantidad di sosten di nos creadornan, kende a traha pa protege nan derecho di expresion, nan carera, y pa yuda negoshinan chikito, particularmente durante e pandemia’.

LEAVE A REPLY

Please enter your comment!
Please enter your name here