(AFP) – Presidente deroca di Venezuela, Nicolas Maduro y su esposa ta bay den huicio na Merca na juni 2027, segun un corte a dicidi diaranson, despues cu Merca a captura nan den un inval asombroso den anochi na januari.
E ex-lider, 63, y su esposa Cilia Flores ta deteni den un prison na Brooklyn pa mas cu siete luna, despues di declara inocencia pa cargonan federal di trafico di droga y arma di candela.
Comandonan Mericano a gara e par for di nan tereno na Caracas dia 3 di januari. E operacion rapido a combina forsanan naval, aereo y terestre, derocando e dictador cu a lidera Venezuela desde 2013.
Durante un audiencia di casi 20 minuut, hues Alvin Hellerstein a pone fecha pa e huicio dia 1 di juni proximo aña despues di un solicitud conhunto di fiscal y abogado di defensa.
Maduro, bisti den un uniform di prison beige y bistiendo bril, no a papia durante su di tres apariencia den corte Mericano otro cu pa cuminsa e corte ora el drenta.
Flores, bistiendo e mesun paña cu su cabey blond mara, a sinta algun pia ley di su esposo, banda di nan abogadonan.
Manifestantenan cu borchi bisando “Libera Presidente Maduro” a reuni pafo di e corte na Manhattan ta zwaai bandera di Venezuela, mientras manifestantenan opositor a tene borchi yamando Maduro y Flores “dictador.”
Hues Hellerstein tambe diaranson a pone un audiencia pa dia 17 di november dedica pa mocion di defensa, incluyendo un reto na e legalidad di e manera con a captura Maduro y Flores.
Maduro mes a bisa cu el a keda “secuestra” y a describi su mes como un “prisonero di guera” na januari.
Desde captura di Maduro, Venezuela ta lidera pa su ex-vice-presidente Delcy Rodriguez, mientras Merca efectivamente ta controla exportacion di petroleo di e pais, cu ganashi bayendo den cuentanan special supervisa pa Washington.
Bataya legal
Fiscalnan Mericano ta alega cu Maduro a usa poder estatal pa protege y promove trafico ilegal di droga, y cu el a alia su mes cu cartelnan pa transporta tonelada di cocaina na Merca.
Maduro a rechasa cuatro di e cargonan cu e ta enfrenta: conspiracion “narco-terorista”, conspiracion pa importacion di cocaina, posesion di machine guns y aparato destructivo como tambe conspiracion pa posee machine gun y aparato destructivo.
Flores similarmente a declara inocencia na tres cargo cu e ta enfrenta: conspiracion pa importacion di cocaina, posesion di machine guns y aparato destructivo como tambe conspiracion pa posee machine gun y aparato destructivo.
Merca na april a permiti Venezuela paga defensa legal di Maduro y Flores, algun anteriormente prohibi pa sancionnan Mericano.
E pareha a busca pa rechaso di nan caso basa riba e hecho cu blokeo di fondo ta viola e derecho Constitucional Mericano pa tin e defensa di e acusado su escogencia.
Maduro tambe ta enfrenta un caso civil na Merca despues cu famia di cinco homber jong asesina na Venezuela a alega cu el a duna orden pa asesinato extrahudicial como parti di un patronchi di violencia estatal.
E keho aki entrega luna pasa ta bisa cu Maduro a pone un forsa di seguridad elite yama Forsa di Accion Special, of FAES, asesina e hombernan entre 2017 y 2020.
Ta bisa cu e victimanan tabata entre miles mata bao comando di Maduro pa unidadnan incluyendo FAES, cu a disolve na 2021 despues di keho di abuso di derecho humano incluyendo for di Nacionnan Uni.
Durante su presidencia di 2013-2026, e tabata acusa ampliamente di usa represion politico pa keda na poder. Ambos di su reeleccionnan na 2018 y 2024 a keda rechasa como fraudulento pa cantidad di pais, incluyendo Merca.
Tabata anticipa cu Maduro lo busca inmunidad den e proceduranan civil como cabes di estado, segun The New York Times a reporta.
