(NLTimes) – Hulanda a perde un di su ganadornan di Premio Nobel. Andre Geim, un fisico Hulandes-Britanico otorga e premio na 2010 pa descubri grafeno, a perde su nacionalidad Hulandes, Volkskrant ta informa.
Nacionalidad Hulandes ta caduca automaticamente ora un hende tuma un otro nacionalidad. Geim, kende ta biba na Gran Britania, a bisa e corant cu el a ricibi un email di e ministerio di asuntonan exterior cu ta inform’e cu esaki a pasa cune. “Mi a ser bisa cu mi mester entrega mi paspoort na e embahada Hulandes na Londres sino Interpol lo bin mi tras.”
“Mi ta hopi decepciona cu mi a perde mi nacionalidad Hulandes, y mi ta hopi rabia tocante esey. E motibo oficial ta cu mi a bira Britanico mas o menos diesdos aña pasa pasobra mi a haya un puesto di cabayero Britanico, pa cua esey tabata un rekisito. Probablemente lo mi a nenga esaki si mi tabata sa kico esey lo a nifica pa mi nacionalidad Hulandes. Mi a protesta na e Ministerio di Asunto Exterior, pero nada no a pasa,” Geim a bisa.
Geim, originalmente di Rusia, a traha na Universidad Radboud na Nijmegen den añanan 90 y a tuma e nacionalidad Hulandes. Ora cu el a haya su premio Nobel, esaki a ser celebra como un impulso pa ciencia Hulandes. Ainda e ta afilia cu Universidat di Radboud como un profesor special.
“Mi ta considera mi mes un ganador di Premio Nobel Hulandes-Britanico – den e orden ey – y mi tin bunita recuerdo di mi tempo na Hulanda, caminda mi a biba y traha,” Geim a bisa. “E ta asina tristo y straño. Un caminda na Den Haag, tin un busto di brons di mi pa mustra, y hasta e Wikipedia Ingles ta yama mi Hulandes. Mi a ricibi un honor real: mi ta comandante den e Orden di Leon Hulandes. Y toch mi a ser saca for di e pais manera un cos inutil.”
