(NLTimes) – Hulanda ta keda un di e dies pais menos corupto na mundo, pero a perde oportunidadnan pa mehoracion den ultimo aña, segun Transparency International (TI). E organisacion sin fin di lucro a duna Hulanda un puntuacion di 78, e mesun puntuacion riba su ranking anual cu e aña anterior, y e puntuacion di mas abao di e pais te awor. Segun TI, Hulanda tin e potencial pa bira un “pais modelo,” pero varios “debilidad mester ser atendi.”

Hulanda ta keda na di ocho lugar den e Indice Internacional di Percepcion di Corupcion, pero TI ta critico riba desaroyonan den e pais. Segun e organisacion, e Gabinete Schoof I a pone presion riba e estado di derecho democratico door di recuri na ley di emergencia y “a acelera e erosion y desacreditacion di sociedad civil.

TI tambe a critica gobierno Hulandes pa sistematicamente no cumpli cu e Ley di Gobierno Habri (Woo). Esaki tambe tabata un problema cu e Gabinetenan di Rutte. Ademas e organisacion a lanta preocupacionnan tocante e “falta di transparencia rond di lobbyists y e stakeholdernan tras di companianan.”

A pesar di e critica aki, Hulanda ta compara faborabel cu mayoria otro pais riba e lista. Pa e proximo prome minister, Rob Jetten, y su gabinete, e organisacion ta mira un oportunidad cu Hulanda por reverti e tendencia global.

Esaki lo “duna Hulanda autoridad moral” y hacie mas atractivo pa negoshinan,” asina director Lousewies van der Laan a bisa. “Un clima comercial saludabel cu competencia husto ta exactamente loke companianan ta busca ora di haci inversionnan,” asina e ex-politico, kende a fungi den Parlamento Hulandes pa D66 entre 2003 y 2006, a bisa.

Merca a baha na di 30 luga. Segun TI, cu Donald Trump den e White House na 2025, e pais “a cambia di un luchador contra corupcion mundialmente pa un catalisador p’e.” TI ta profundamente preocupa pa e uso di presion politico pa silencia prensa, e normalisacion di conflictonan di interes y politica transaccional, y minamento di poder hudicial independiente.

Varios pais desaroya awor ta pio den e ranking cu nan tabata dies aña pasa. Durante e periodo aki, Hulanda a perde cinco punto (di 83 pa 78), Reino Uni 11, y Belgica ocho. E nivel actual ta esun di mas abao pa Hulanda.

Dinamarca ta na cabes di e lista cu 89 punto, sigui di cerca pa Finlandia, cu a score un punto mas abao. Sur Sudan y Somalia ta comparti e ultimo luga.