E conferencia di Organisacion Internacional di Labor (ILO) ta trece lidernan di gobierno di tur parti mundo hunto pa delibera riba con pa promove husticia social y mehora e posicion di empleadonan. Durante e di 113 edicion di e conferencia di ILO, Minister mr. Wendrick Cicilia y director general, Sr. Stan Kaatee a probecha e momento pa intercambia pensamento riba e vision y maneho pa e sector laboral.
Segun un comunicado di prensa, minister Cicilia a capitalisa riba e momento pa combersa cu director general, Stan Kaatee y splik’e tocante e ehecucion di e ‘landspakket’, e intencion pa colabora cu Inspeccion di Labor di Hulanda pa asina mehora e supervision pa cu cumplimento cu leynan laboral, e posicion di esunnan cu ta traha pa un ‘uitzendbureau’ y e importancia di mantene e relacion cu e organisacionnan internacional cu ta ofrece nos posibilidad pa diferente guia, asistencia tecnico y e tratadonan cu ta proteha nos trahadonan contra abuso laboral.
Minister Cicilia tabata presente pa representa Reino Hulanda mirando cu na e momentonan aki no tin un minister di Labor activo na Hulanda. Pa e edicion aki di ILO, no a conta cu presencia di e ministernan di Labor di Corsou y tampoco St. Maarten.
Segun e comunicado, e diplomatico Hulandes a expresa na e mandatario cu di parti e representante permanente di Reino Hulandes na ILO Geneve, por conta cu sosten disponibel pa asisti Aruba relaciona cu maneho y tratado cu ta promove husticia social.
Na nomber di Gobierno di Aruba, Minister Cicilia a expresa na e delegacion di Reino Hulandes cu Aruba tambe ta parti di Reino y nos ta balora nos relacion dentro di Reino y nos relacionnan internacional, pa loke mi ta presente representando gobierno di Aruba. Mi ta haci un yamado na e delegacion di Reino pa tambe defende interesnan di Aruba y duna nos sosten cu solicitudnan pa asistencia tecnico. Segun e comunicado, e representantenan di Reino Hulandes a responde bisando cu nan t’ey pa nos.
