E ta bira como 20 euro mas caro pa biaheronan cu ta cuminza nan vakantie na Schiphol. E ta nifica cu en bes di e 8 euro cu a cuminza paga na Januari 2021, entrante Januari 2023 lo paga 26,43 euro. E aumento di e ‘vliegtaks’ ta parti di e acuerdo di gobernacion di e coalicion Hulandes. E entrada lo bay parcialmente pa haci aviacion mas duradero y reduci e efectonan pa areanan residencial.

Segun Gobierno Hulandes, e aumento di belasting ta pa haci e diferencia entre un pasashi di avion cu esun di trein mas chikito. E aumento di e ‘vliegtaks’ lo produci 400 miyon euro mas na entrada di belasting, riba e 200 miyon cu a cuminza drenta desde 2021.

Los di e intencion pa haci biahamento cu avion menos atractivo, Gobierno ta spera di e forma aki cu e belasting ta contribui na e costonan di sociedad.

Accionistanan di clima ta argumenta cu impacto di biahamento cu avion riba cambio di clima ta hopi grandi y e obhetivo mester ta pa haci vakantie mas sostenibel. Pa Hulanda e ta nifica cu ta stimula e biahero pa scoge pa trein of bus. Pa compara, Alemania ta cobra 13 euro vuelonan den Europa y 59 euro pa vuelonan intercontinental.

Aruba

Bon Dia Aruba a tuma contacto cu Director di Aruba Tourism Authority, Ronella Croes riba e desaroyo aki y pa mira si ta prepara pa e aumento aki. “No por prepara necesariamente pa esaki. Locual mi por bisa ta cu tin un proyeccion pa Hulanda pa 2023,” Croes a splica. E proyeccion ta ilustra cu Aruba por ricibi mas di 46 mil bishitante na 2023, for di Hulanda. “For di Europa nos tin un crecemento di cinco porciento pa 2023, versus 2022.

Di otro banda, e team di ATA ta hopi consciente di e aumento di gasto pa biaheronan y e posibel impacto pa Aruba. “Nos ta monitorea costo di vacacion pa Aruba di cerca. Hecho ta cu tin aumento di varios aspecto for di varios mercado y cu tin cu tene cuenta cu aumento di costo local tambe. Si tin impacto negativo riba turismo, ta confia cu acomodacionnan y aerolineanan entre otro lo ahusta nan prijs tambe.” Den otro palabra, ATA ta spera cu e otro partnernan lo reduci nan prijs pa asina por sigui haci negoshi. “Te cu awor proyeccionnan ta indica cu volumen di bishitante pa Aruba lo mira un crecemento pa otro aña y mesun cos ta aplicabel pa entrada directo pa medio di turismo (tourism receipts) pa Aruba pa 2023,” tabata e comentario di Ronella Croes, Director di ATA.

LEAVE A REPLY

Please enter your comment!
Please enter your name here