Gobierno Hulandes ta alocando 150 miyon euro di e programa SDE++ (Stimulacion di Produccion di Energia Sostenible y Transicion di Clima) pa sostene e transicion di energia na Aruba, Corsou y Sint Maarten.
Minister di Clima y Crecemento Berde di Hulanda, Sophie Hermans a haci e anuncio aki durante e Conferencia di Clima y Energia di Caribe, cu ta tumando lugar e siman aki na Corsou.
Medionan di comunicacion di Reino, incluyendo Curaçao Chronicle y NOS, a reporta cu e suma ta parce modesto compara cu loke e transicion di energia ta costa na Hulanda. Gobierno Hulandes ta invertiendo cantidad di biyones djis den reforsa e rednan di voltahe halto di Tennet, cu ta necesario pa transporta coriente genera sosteniblemente.
Segun NOS, e 150 miyon euro pa Aruba, Corsou y Sint Maarten ta destina pa, entre otro, expande e red di electricidad na e islanan, pero no pa parkenan nobo di biento y solo. Fondonan adicional no ta necesario pa esaki, pasobra ta bisa cu partidonan comercial ya a mustra suficiente interes.
Di e total di 150 miyon euro, 62.9 miyon ta pa Corsou, 53.6 miyon pa Aruba, y 33.46 miyon pa Sint Maarten. Ta spera cu e fondonan aki ta bay yuda acelera e transicion na sistemanan di energia mas resiliente y sostenible na e islanan, yudando nan reduci nan dependencia riba combustiblenan fossiel y prepara pa retonan climatico den futuro.
