Hulanda ta confisca 14 mega yate en conexion cu sancion Ruso y Belaruso

(NLTimes) – Autoridadnan Hulandes di aduana a confisca 14 mega yate na sitio di construccion di barco na Hulanda cu ta pertenece na persona Ruso, Minister di asuntonan Stranhero a skirbi na parlamento.

E barconan di luho no por sali for di e pais pa causa di sancion contra Rusia, Belarus, President Vladimir Putin y magnatenan. E yatenan ta prohibi di ser formalmente entrega na nan doño, e minister a bisa.

E decision ta involucra 12 yate bao di construccion, incluyendo mega yate di mas di 35 meter y dos yate bao mantenimento. Aduana a investiga e mercado di compra y benta di yate. “Nos a ripara cu e sitionan na hulanda ta cooperando completamente apesar di e impacto di e sancionnan,” director general Nanette van Chelven di Aduana a bisa NOS. Un investigacion te ainda ta den proceso na 15 otro sitio y 5 persona cu ta bende yate.

“E imagen actual ta di un total di 12 yate cu ta bao di construccion na 5 diferente sitio pa supuesto UBO (Ultimate Beneficial Owner) Ruso. Esakinan no ta e personanan cu ta den e lista di sancion Europeo, sinembargo mirando e medidanan actual, e yatenan aki no tin mag di ser suministra, transferi ni exporta na e momentonan aki,” Hoekstra a skirbi. Un di e yatenan ta practicamente completo. Nan structura tambe ta bao investigacion.

“Adicionalmente, tin 2 otro yate cu ta bao mantenimento na sitionan Hulandes cu a ser poni bao di supervision mas estricto di Aduana.” “E conexion entre un di e yatenan aki cu un persona nombra riba e lista di sancion Europeo ta bao di investigacion. E di dos yate probablemente ta pertenece na un persona Ruso of Belaruso, sinembargo e ta prohibi pa provee servicio na yatenan cu no tin licensia.”

Hoekstra a confirma cu 516 miyon euro di bienes Ruso a ser congela, y 155 miyon euro den transaccion a ser blokia pa Hulanda. Despues di critica di Tweede Kamer, Gobierno ta mehorando e implementacion di e sancionnan contra di Rusia. Riba dialuna, ex minister Stef Blok a ser nombra e coordinador di cumplimento di sancion. E lo supervisa cu tur bienes Ruso congela y cu tur boto y propiedad Ruso ser confisca na Hulanda.”