Hulanda ta interveni den aviacion

Diripiente gobierno di Hulanda ta aparece na horizonte pa interveni den e asunto InselAir, tanto na Aruba como na Curaçao. Cu aprobacion di gobierno (demisionario) di Curaçao y di Aruba, autoridadnan di aviacion lo yuda e autoridadnan na ambos isla pa yega na un nivel di control y supervision manera cu esaki ta na Hulanda. Esaki a base di un rapport cu expertonan Hulandes a traha a base di nan experiencia te awor durante e investigacion cu nan a haci caba.

Cos mester ta bastante grave pa esey sucede y asina e caso ta parce tambe. Tanto Merca como Hulanda a duna un advertencia di gravedad di e caso, prohibiendo nan empleadonan pa bula cu e compania aki. E impresion cu ta surgi ta cu e situacion ta asina serio, cu ta pensando cu riba nan mes e autoridadnan concerni no ta logra reestablece orden. Segun e declaracion duna na Aruba ayera tardi pa e secretario di estado Sharon Dijksma, e situacion na Aruba ta menos grave cu na Curaçao. Una vez cu e recertificacion di e avionnan di InselAir Aruba keda cla, por atende e problemanan di administracion y procedemento cu ta menos serio na e otro isla, unda tin varios otro asunto grave.

Nos por imagina cu inmediatamente nos ‘campeonnan di autonomia’ ta cuminsa grita cu “pakico mester a yega na esaki; nos mes mester por maneha nos asuntonan aki!” Y nos ta bisa:”en berdad, pakico e cos aki a yega asina leu?” “Nos mes no por a percura cu e autoridadnan concerni a haci nan trabao manera mester ta y detecta y coregi e desaroyonan negativo y peligroso aki na tempo?” E contesta corecto ta: lamentablemente no! Ta obvio cu na ambos isla e supervision di aviacion no tabata funciona debidamente y esaki den un asunto unda bida di hende ta envolvi. Tanto na Aruba como na Curaçao e mandatarionan concerni a bay di acuerdo caba cu e envolvimento di e Hulandesnan den un trayecto largo, cu e obhetivo pa logra mehora e departamentonan concerni structuralmente.

Y, den tur esaki, unda e ministro encarga na Aruba a keda? Aparentemente el a reuni cu sra. Dijksma, a bay di acuerdo cu e Hulandesnan ta tuma accion di inmediato mandando experto di inspeccion pa Aruba pa mas pronto posibel termina e recertificacion di e avionnan di InselAir Aruba cu ta permanece na tera, y pa despues sigui cu e proceso di mehoracion interno necesario cerca e autoridad supervisor na Aruba. Pero imagina e situacion absurdo aki un rato: ta bin un mandatario di Hulanda bin regla un asunto cu tin nan super preocupa, e ta papia cu e mandatario concerni y e unico cu ta duna cuenta detaya na prensa ta esun Hulandes? Di e ministro di Aruba a sali solamente un mencion casual meymey di otro tema den dos recado di prensa emiti ayera nochi! Asina grandi e diferencia ta entre e preocupacion Hulandes y esun di nos gobierno?

No ta mas cu normal si awor parlamento bin den accion y exigi un interpelacion di e ministro, pa e duna claridad con di banda oficial di Aruba nan ta mira e asunto, cu no ta toca solamente e compania di aviacion, pero tambe e structura di supervision cu mester funciona debidamente. E solo hecho cu ta ‘ground’ practicamente tur avion di e compania na mesun momento ta un indicacion cu mester a tuma un medida di emergencia, unda normalmente, cu control regular y eficaz, un paro masal asina lo no a sucede nunca. E impresion ta cu e autoridadnan a faya den nan papel di supervision, pero no ta nan debe Aruba un splicacion, sino esun cu ta responsabel politicamente.

Henter e asunto aki, cu ta hopi serio pasobra, manera bisa anteriormente, ta trata di bida di hende, y como agravante por mustra cu accidente a yega di sucede caba den pasado, cu varios morto di lamenta, y aparentemente nos no ta siña. Den e caso na cual nos ta referi, e tempo ey tabata trata di reparacion na un avion cu a ser haci na un forma no autorisa, cu a ocasiona e accidente. Algun tempo pasa nos a dedica un editorial na e tema di e ‘cosnan normal’, cu nos ta desea pa cualkier gobierno tuma como responsabilidad pa laga nan cana manera mester ta. Drecha caminda, traha acera pa hende cana, percura pa tur scol ta drecha, percura pa awa y coriente na prijs rasonabel… y tambe e sorto di cosnan aki. Nos mester por confia cu nos mes organonan di control ta funciona manera mester ta, sin distincion di persona. Den un luga chikito manera nos isla, nos mester cuida nos mes pa e peligro cu den cierto area y ambiente di trabao ta bira demasiado ‘familiar’ cu otro. Conflicto di interes ta un peligro real den e tipo di asunto aki.

Nos mester yega na conclusion cu keto bay no tin regla ( y practica) estricto pa garantisa cu e organismonan di control no ta bira demasiado relaha y no ta haci nan trabao manera mester ta? Kico ta pasando?

You May Also Like

editorial 2_44.jpg

Become Energized

Man bun bespoke freegan, kitsch retro ethical banh mi williamsburg drinking vinegar sustainable heirloom ...

editorial 2_15_1_90.jpg

Dos luna y nada di Valero Reapertura no tin fecha?

E siman aki ta haci dos luna cu a conclui e acuerdo cu Citgo ...

Salubridad prioridad? Continuacion…

Den nos editorial di ayera nos a enfoca hopi riba e prioridadnan y costo ...

Awor campaña a cuminsa den serio

E mester a sucede na cierto momento. Un di e dos rivalnan grandi cu ...

Ken ta sirbi ken?

Nos t’ey pa sirbi gobierno?   Un empresario, di un NV local, ta dicidi ...

‘Ikke niet maar hij ook’: E comedia di politico testigo…

E expresion “ikke niet, maar hij ook…” (“Ami no, pero e tambe”) tabata uno ...