(NLTimes) – Discriminacion dentro di organisacionnan gubernamental ta prevalente, pero un manera pa combati esaki tabata falta te awor, e Comision di Estado contra Discriminacion y Racismo a conclui mas trempan. Pa prome biaha, e comision a introduci un test cu segun informe ta expone y atende discriminacion dentro di organisacionnan cu ta duna servicio publico na ciudadanonan.
E test ta enfoca riba discriminacion contra hende muhe, hende cu discapacidad, individuonan di diferente religion, y hende di diferente entrada of antecedente social. E proceso tin como meta pa proteha esnan cu mas ta core riesgo di discriminacion y garantisa cu nan ta ser trata husto dentro di organisacionnan di gobierno.
“E test ta consisti di cuater sesion. Den esakinan, bo por examina bo propio organisacion si bo ta duna servicio publico na ciudadanonan,” Joyce Sylvester, presidente di e comision, ta splica na NOS Radio 1 News. “E ta duna resultado di berdad.” Na final di e sesionnan, organisacionnan ta ricibi un tipo di “X-ray” cu ta revela unda e riesgonan di discriminacion ta existi.
Prome cu a introduci e test oficialmente, a realisa un piloto cu varios organisacion, entre otro DUO, Douanne, y municipio di Arnhem.
E piloto a conduci na un revision di e proceduranan pa otorga e subsidio di DUO pa biba leu for di cas, maneha controlnan di Douanne despues di vakantie, y verifica adresnan di municipio. E revision tabatin como meta pa sigura cu e practicanan ey a reduci e riesgo di discriminacion.
