Halsando un linea delega a traves di e awanan separando e provincianan di Noord Holland y Friesland, e Afsluitdijk di 87 aña di edad ta un di e defensanan clave contra un enemigo antiguo: lama. Cu cambio climatico treciendo mas tormenta poderoso y nivel di lama elevando, e dijk ta haya un makeover grandi.
Gobierno Hulandes a embarca den un proyecto pa sigura e dam iconico di 32km pa futuro. Trabou ya caba ta na caminda y ta spera di continua te cu aña 2023.
E siman aki lo delinea den un reporte cientifico di Nacionnan Uni tocante e impacto di cambio climatico riba ijs y ocean, incluyendo kico precies Afsluitdijk y resto di e regionnan costeño di mundo lo mester soporta den proximo decadanan.
Hulanda, kende nan pais abou ta marca cu riu y rondona cu lama, ta batayando contra awa pa siglonan. E reto lo bira cada bes mas grandi mientras temperaturanan halto ta causa nivel di lama pa eleva. Cu esaki den mente, gobierno e aña aki a establece un ‘programa di concemento riba nivelnan di lama aumentando’, cu meta pa duna experticio na e programa andando di construi y mantene defensa contra awa. “Actualmente, Hulanda ta e delta mas sigur den mundo”, gobierno a bisa, anunciando e programa nobo. “Nos kier mantene asina.”
Ingenieronan ta reforsando Afsluitdijk, incluyendo poniendo miles di bloki di concreto traha specificamente y elevando partinan di dje. Ademas ta mehorando e autopista cu ta core riba e strip estrecho di tera traha pa hende, cual ta entre e lama Wadden y e lama Ijsselmeer, cual, a pesar di su nomber, ta tecnicamente un dam y no un dijk, pasobra e ta separa awa for di awa.
E trabou di diseño vanguardista pa e refuerso no ta wordo haci riba beach of estuario, pero den un tanki conoci como e canal den area industrial di Delft, e ciudad historico miho conoci pa pintor Johannes Vermeer y su porselein delicado.
Ingenieronan a construi un modelo na escala di e seccion di cruce di Afsluitdijk den e tanki y ta yenando esaki cu ola, cual nan ta bisa lo mester pasa apenas un bes den cada 10mil aña. E meta ta pa sigura cu e diseño nobo por sobrevivi e poder destructivo di un tormenta asina.
Mark Klein Breteler, experto di dijk y project manager na Deltares, e centro di investigacion di awa cu a construi y ta uza e canal, a bis cu e diseño nobo di Afsluitdijk mester por soporta tur locual cambio climatico tira riba dje.
E sorto di innovacion aki, y e cuido constante necesario pa mantene e miles di kilometer di dijknan di Hulanda no ta barata. Gobierno a prepara casi 18 biyon euro pa e proyectonan aki pa 2020-2033.
Pero e balor di e inversion aki ta mas cu pia seco pa e 17 miyon persona cu ta biba na Hulanda. Un grupo den e industria a calcula cu exportacion di e sector di awa di e pais tabata na balor di 7.6 biyon euro na 2018, ya cu Hulanda ta bende nan experticio na otro pais y ciudad rond mundo.
