Hulanda: Yamadanan record na hotline di abuso mientras cu aumento den miedonan pa femicidio

(NLTimes) – Veilig Thuis, e hotline di violencia domestico na Hulanda, a ricibi un record di 25,127 yamada na juni, un aumento di 31% compara cu e mesun luna aña pasa, NOS a reporta.

E aumento drastico ta bini den medio di conscientisacion publico creciente tocante femicidio – e asesinato di un muhe pasobra e ta muhe – y un preocupacion creciente tocante control, stalking y partnernan of familiarnan violento.

E problema a tuma un urgencia nobo despues di un serie di atake mortal. Den juli di 39 aña Joeweela a ricibi tiro na Gouda di su ex pareha, Driekus K., dilanti nan 2 yiu. E tabata bibando den un shelter pa hende muhe y a entrega un keho di agresion den juni. A pesar di su historia di violencia – incluyendo un condena anterior pa intento di asesinato di un partner anterior – K. a keda liber for di custodia y despues a yega na su pareha cu excusanan falso. Polis awo ta investigando si un di dos sospechoso a hib’e na e escena di e asesinato. Despues di e asesinato, K. a comete suicidio den duinnan cerca di Scheveningen.

Mas adelante den e mesun siman aki, un muhe di 38 aña a ricibi herida fatal di su pareha na Vlijmen mientras cu su yiu di 3 aña tabata na cas. Bisiñanan a bisa cu e muhe anteriormente a experiencia violencia domestico den otro relacion.

Reportahenan di cuerponan di gobierno di supervision ta sigui enfatisa fayonan den sistema di atende e violencia domestico cu por ta letal. Den 2024, IGJ a haya cu e temponan di espera na Veilig THuis – cual tambe ta responsable pa evalua e nivel di peligro den e caso reporta – ta keda excesivamente largo. “Esaki por tin consecuencia serio,” IGJ a adverti.

E pais tambe ta enfrenta un escasez di espacio di shelter pa esnan cu no ta safe mas na nan cas. Stalking, considera un di e señalnan mas fuerte prome cu femicidio, actualmente por ser investiga pa polis si e victima entrega un keho formal – algo cu hopi muhe tin miedo di haci.

A pesar di e desafionan aki, prevencion no ta imposible, segun expertonan. Sinembargo, den practica, varios victima no ta al tanto di unda pa busca ayudo, specialmente ora nan tin miedo cu entrega keho por involucra directie voogdijraad.