Den cuadro di celebracion di Dia di Birgen Mercedes, patrona spiritual di e bomberonan, Hunta di Bombero Dominicano di Aruba na San Nicolas a tene un servicio religioso celebra pa e pastoor Pedro Ernesto Minaya y un desayuno den Star of Unity Lodge No.5 na San Nicolas.
Hunto cu e fecha tan special aki nan a celebra e di 7 aniversario cu e brigada a wordo funda na Aruba. P’esey nan a realisa un bishita di cortesia cerca e Consul nobo di Republica Dominicana na Aruba, Victor Compres Rosario, caminda nan a estrecha e lasonan di colaboracion.
Comandante Rolando Wilson a informa cu pa aña 2022 nan brigada ta bay celebra 10 aña di existencia, y e lo bira un celebracion di luho y gala. Nan tin plania di bin cu un banda musical, tambe lo bin un coro cristian di nan institucion principal di San Pedro de Macori. Ademas lo bini un delegacion di varios oficial di bombero importante di Republica Dominicana.
Comandante di e brigada aki, Coronel Rolando Wilson a declara na Bon Dia Aruba cu pa nan como bombero Dia di Birgen Mercedes ta un dia masha special. Generalmente e dia aki ta wordo celebra dia 24 di september, pero nan a dicidi di celebr’e despues, probechando e fin di siman cu mayoria di nan miembronan ta disponibel.
E aña aki e brigada por a realisa diferente actividad boluntario na beneficio di nos comunidad. Pa loke a bay cori di aña 2019 e brigada a yega di realisa 12 accion boluntario entre otro di limpiesa na diferente fundacion.
Actualmente nan ta trahando pa manda un donacion pa Santo Domingo pa atende cu algun necesidad cu nan tin. Na luna di maart ultimo nan a biaha na San Pedro de Macori pa celebra cu nan coleganan e di 140 aniversario di existencia di nan cuerpo di bombero. Pero tambe e Dia di e Academia Internacional di Bombero, y igualmente e Dia di Bombero cu a wordo institui pa ex Presidente Hector Bienvenido Trujillo.
