Facebook ta pasando e responsabilidad pa e suspension indefini di ex-presidente Donald Trump na un hunta di supervision quasi-independiente, preparando un test mayor pa e panel recien estableci.
E gigante di rednan social a bisa ayera cu ta kere cu a haci e decision corecto pa suspende Trump despues cu el a incita su sostenedonan pa yega na e US Capitol den un asalto mortal dia 6 di januari. Pero a bisa cu ta referiendo e asunto na un hunta di supervision pa loke a yama un ‘veredicto independiente’ pa sostene e decision.
E panel di Facebook tin intencion pa dicidi riba asuntonan contencioso, manera na momento cu postnan ta constitui discurso di odio – of si e decision pa suspende un lider mundial tabata esun corecto. E tin poder pa haci decicionnan obligatorio – esnan cu CEO Mark Zuckerberg no por cambia – riba si postnan of avisonan ta viola reglanan di e compania. Cualkier otro hallazgo lo ser considera como ‘guia’ pa Facebook. E hunta no ta pone politicanan di Facebook ni dicidi si e compania ta haciendo suficiente pa cumpli esakinan.
Su 20 miembro, cu eventualmente lo crece te bira 40, ta inclui un ex-prome minister di Dinamarca; ex-hefe di edicion di corant Guardian; hunto cu academiconan legal, expertonan di derechonan humano, y periodistanan manera Tawakkol Karmanm, un Laureado Nobel y periodista di Yemen, y tambe Julie Owono, un defensor di derechonan digital.
E prome cuatro miembronan a ser scogi directamente pa Facebook. E cuatro aki a traha cu Facebook pa selecta miembronan adicional. Facebook tambe ta paga e salario di e miembronan di e hunta.
Twitter, den contraste, a prohibi Trump permanentemente di su plataforma. CEO Jack Dorsey a defende e prohibicion di su compania den un hilo di tweet filosofico siman pasa, bisando cu e riesgo pa seguridad publico a crea ‘un circunstancia imposibel y extraordinario’ pa e compania.
Pero el a reconoce cu muestranan di poder manera e prohibicion di Trump por pone un precedente peligroso, hasta yamando nan un señal di ‘fracaso’. El a sugeri cu Twitter mester haya manera pa evita yega na un punto cu mester tuma decisionnan asina na prome luga, y a lamenta e hecho cu nan ta resalta e poder extraordinario cu Twitter y otro companianan di Big Tech por eherce sin responsabilidad ni recurso.
