Poder Hudicial Peruano a ordena ayera e aresto pa 10 dia di ex-presidente Pedro Pablo Kuczynski, den e marco di un investigacion cu ta sigui pa e supuesto delito di labamento di activo, den e scandal di corupcion Odebrecht.
E di tres husgado di Investigacion Preparatorio a ordena e detencion preliminar pa 10 dia contra ex-presidente Pedro Pablo Kuczynski, un comunicado di e Poder Hudicial a indica.
Na juni di aña pasa, e fiscal José Domingo Pérez a habri un Investigacion Preliminar pa labamento di activo contra e ex-presidente Peruano Kuczynski, Alan García y Alejandro Toledo, pa via di e supuesto aporte di e empresa Brasilero Odebrecht, Ministerio Publico a informa diadomingo pasa.
E investigacion a ser origina pa e declaracion di e ex-directivo di e constructor Brasilero na Peru, Jorge Barata, cual a ser ricibi pa fiscal Peruano na Brasil, ora ta referi pa e aporte di e campaña cu supuestamente e compania a haci pa su organisacion politico respectivo.
Keiko Fujimori, ex-candidato presidencial derota pa Kuczynski na 2016, a ser aresta pa mesun causa na october di 2018. E lider di e partido opositor Forsa Popular, a ser deteni despues di asisti pa un tribunal pa un interogacion di e investigacion pa supuesto labamento di activo hunto cu su casa, e Mericano Mark Vito.
Durante e interogacion di Barata, realisa na februari di 2018, e ex-directivo a bisa cu su empresa a haci aporte pa e campaña electoral di Kuczynski y Toledo na 2011, y pa Alan García na 2006.
Kuczynski a renuncia pa e presidencia di Peru na luna di maart pasa pa su vinculo cu Odebrecht, despues di laga e gobierno di Toledo den e cual tabata prome minister y titular di Economia.
