Husticia ta cumpli… Dia tin prevencion…

E caso penal contra dos agente policial cu tabata responsable pa morto di un hoben mas di un aña pasa, den su promer fase a resulta den un condena di tres aña di prison, di cual uno ta condicional. Cu esey por bisa cu husticia a cumpli, un huez a mira e caso di tur banda y a confirma loke gran mayoria di ciudadano a pensa desde inicio. Pero cu esey e asunto no a termina. Ta sigui, muy probablemente, un tratamento di e caso den apelacion y finalmente hasta un ultimo dilanti corte supremo na Hulanda. Tur esaki ta normal den cualkier sistema hudicial, aunke un tempo tormentoso pa famia di esnan envolvi.

Despues ta sigui ehecucion di e eventual castigo, si den apelacion esey keda confirma. Esaki ta pa e persona(nan) condena sinta nan castigo y por reflexiona tocante e siguiente fase den nan bida. Reincorporacion den sociedad tambe ta parti di esey.

Pero esey no ta tur. Husticia tin otro aspecto cu hopi biaha ta keda ignora; esey ta encera e pregunta kico mester cambia pa nos no sigui haya e tipo di incidente lamentable aki. Te na e momento aki, si nos no ta equiboca, no a tende di un revision di maneho policial den caso di uso di arma. Y esey ta parce nos algo cu no por keda opcional, si autoridadnan concerni ta desea esey. Ta demasiado obvio cu tin algo cu no ta cuadra dentro di cuerpo policial. Den ultimo añanan tabatin varios caso den cual a haci uso di arma policial, unda no tabata aparece solamente toma di decision robez den situacion critico, sino tambe otro aspecto cu ta mustra riba un preparacion y guia deficiente di agente policial.

Laga nos cuminza cu e uso di arma di candela corecto. Pa esey un anecdota, conta pa un persona conoci na nos redaccion, cu ta yiu di polis. Den añanan 50 di siglo pasa un dia atardi e tata polis a sali for di warda di polis na San Nicolas y a topa cu un persona burachi cu tabata rasca e autonan di polis cu un cuchiu. El a bay reclama e persona su comportamento y a haya un corta di como cuatro pulgada na su braza. Su coleganan a sali pa yuda detene e homber. Despues, den seno familiar a surgi e pregunta na e tata, cu tabata arma pero a scoge pa no usa e arma, y pakico no? Su contesta: “Mi no a hacie pasobra e no tabata un situacion pa saca arma. Y si acaso mi mester a usa arma, mi lo a tira riba parti abao di su curpa. No tabatin motibo pa morto cay den e situacion ey.” E incidente describi aki a tuma lugar casi 70 aña pasa, y ta ilustra con mester actua semper, di forma corecto y na midi. Den e decadanan despues nos por a mira varios caso di uso di arma policial, unda den hopi di nan e uso tabata corecto y na midi, y otronan no. Y loke semper a keda un misterio kico realmente ta e instruccionnan di uso di arma policial. Por ta cu autoridadnan ta haya cu esey no ta asunto pa duna cuenta na publico, pero e ora nan ta keda cu e responsabilidad si di splica ta kico a bay robez den e incidente fatal di aña pasa. Nos no mester sa tur detaye pero nos mester por sa cu nos no ta bibando den e mundo di serie policial Mericano di television o internet, pero mas importante ainda nos mester sa cu e agente policial, en general, no ta bibando den e mundo ey…

Y esaki ta importante tambe pasobra nos ta un comunidad chikito, riba un isla. Bo por core pa autoridad pero den mayoria di caso bo no ta yega leu. Nan a capta bo number di auto, nan por regla asunto e siguiente dia. No tin motibo pa tira riba un persona cu ta huy, sin cu e tin un arma y no ta presenta peligro pa e agente(nan) policial, ta pesey e ta huy. Sin embargo, a lo largo di tanto aña nos a conoce varios caso di tiro riba persona no arma.

Pero tin mas asunto pa trata cu e uso di arma so. Nos a conoce den ultimo añanan algun caso fatal unda polis mester a duna asistencia pa maneha situacion cu persona cu ta bao tratamento psiquiatrico; esun mas reciente na inicio di e aña aki. Nos no ta bay duna opinion den e ultimo caso aki, ya cu e ta bao investigacion hudicial ainda, pero nos pregunta ta mas general. Por ehemplo: por conclui cu te awe ainda aparentemente ta subestima e tipo di situacion aki, atendiendo nan cu un minimo di personal, pa via di cual uso di arma den cierto situacion ta bira e unico opcion? Den e casonan aki no ta trata tanto di e responsabilidad individual di e agente policial, cu mester sa evalua, tin ora den decimo di seconde, kico ta lo corecto pa haci den cierto situacion di emergencia. Ta trata aki di e responsabilidad di e cuerpo mes pa no pone personal policial den situacion di riesgo innecesario, entre otro evitando cu ta pone personal hoben y cu menos experiencia riba tarea cu ta requeri presencia di personal mas adulto y experimenta. Por ta cu aki tambe ta bisa cu esey no ta algo pa comparti cu publico, pero anto lo mester soporta e critica cu ta bin den e siguiente incidente, unda obviamente algo lo a bay robez, atrobe.