E berano aki, fundacion pa educacion, conscientisacion, bienestar y rescate di cacho, Luna Foundation, a introduci e programa di ‘Rent a Dog’. Esaki ta duna oportunidad pa saca un di e cachonan di e santuario pa un dia di diversion, un oportunidad diferente y alegre pa haci den famia y cu muchanan, y cu ta contribui pa un bon causa!
Luna Foundation a splica riba nan rednan social cu cachonan tin mas probabilidad di ser adopta despues di un aventura dibertido. “E berano aki, haci un diferencia den bida di un cacho door di hiba un di e cachonan di nos santuario pa un mainta di diversion!” e fundacion a bisa. Sea ta un paseo riba beach, busca algo di come, of djis pasa un dia sosegando na cas, tur esaki ta yuda e cachonan. Cada aventura ta duna e cachonan un break di e santuario, y ta mehora nan chens di haya nan hogar pa semper.
Pa muchanan cu no tin cacho na cas y kier experimenta un dia alegre cu un compañerito divertido, esaki ta un tremendo oportunidad den vakantie! Alabes ta siña e muchanan e satisfaccion di contribui na un comunidad cu mas compasion y comprension pa bestia. Pa famianan cu kier haci algo diferente y yuda un otro ser haya alegria den su bida, y pa cualkier hende cu kier yuda un animalito y alabes haci algo hopi leuk, Rent a Dog ta un oportunidad unico y bunita pa tur.
Por tuma contacto cu Luna Foundation mediante e website www.luna-aruba.com/dogs.
