Huzga gobierno na 100 dia… Ta asina importante…?

Mundialmente tin un custumber, por bisa un tradicion, pa duna un promer evaluacion di un gobierno nobo na 100 dia di actuacion. Esey ta un ehercicio util? En principio tur hende ta pendiente di loke ta bay pasa despues di instalacion di un gobierno nobo, pero hopi ta depende tambe di e estilo di un cierto gobierno. E inicio por bay acompaña pa hopi boroto di un gobierno cu ta drenta cu tur su artiyeria cla pa tira riba tur loke ta move. E mihor ehemplo di esey ta loke nos por a observa na Merca, unda gobierno di Trump den 100 dia a pone mundo riba su cabez. Esaki cu un avalancha di ‘executive order’ cu cerca nos lo tabata decreto, sea nacional o ministerial. Awor, na algo mas di cinco luna di gobernacion no ta asina dificil pa mira consecuencia di e maneho ey, pero si ta dificil mira e parti positivo, tanto na e pais mes como na nivel internacional.

Pero no tur gobierno ta drenta cu e actitud ey. Ta posible cu un gobierno ta drenta na un manera mas tranquil, pero esey no ta bisa cu nan no por ta efectivo; esey ta depende di kico nan tabatin prepara caba pa e diferente carteranan y kico ta e cambionan di maneho cu nan ta cuminza ehecuta. Aunke por ta un poco tempran pa tin propuesta di ley prepara caba, lo ta logico si cu por anuncia riba ki tereno por spera legislacion pronto y pakico. E ultimo aki pasobra esey ta duna expresion na e maneho cu lo bay hiba, drechando o mehorando loke eventualmente loke e gobierno anterior a laga atras pa haci, cu tin sentido, plus loke a keda sin haci, cu igualmente tin sentido pa haci.

Na nos pais, unda e gobierno nobo a caba di cumpli su 100 dia na mando, a bay bastante tranquil riba tereno di maneho, pa loke ta trata e tareanan normal di gobiernacion. Pero esey no a implica cu no tabatin bochincha, cu por cierto no a termina ainda. Hopi atencion a bay na e nombramento di e ministro faltante, mientras cu recientemente a keda bon cla cu lo mester scoge pa propone otro candidato. Despues di e anuncio ey di banda di ministro presidente a reina un silencio dentro di e partido concerni, posiblemente pasobra a comprende porfin cu gritamento y bay corte no ta yuda den un proceso confidencial, unda e decision final no ta ni den man di e actual gobierno. Di tur manera henter e asunto aki a kita atencion cu mester a bay na e otro tareanan di gobierno. Nos no ta bay perde tempo cu evalua e promesanan di e partidonan den gobierno, ainda, manera gran parti di prensa local ta haci. Esey no pa expresa simpatia cu e actual gobierno, sino cu ta considera cu gobierno lo t’ey, en principio pa cuatro aña y lo tin tempo pa evalua.

Ademas tin prioridad na cantidad, si gobierno ta bay haci algo cu nan si of no. Pa cuminza, nos tin un acuerdo cu gobierno Hulandes pa ehecuta un paquete di reforma, unda no ta importa ta ken ta den gobierno. Y si manera nos a constata na varios momento durante e ultimo añanan, cu nos ta bayendo na paso di morocoy cu e reformanan aki, esey en todo caso no ta culpa cu por deposita riba cuenta di e actual gabinete. E pregunta cardinal ta: kico nan desde awe, mejor dicho desde 100 dia pasa ta bay haci cu e prioridadnan aki, plus e otro asuntonan urgente, cu No ta den e Landspakket? Pa cuminza cu e ultimonan aki, ta resalta e problemanan di infrastructura cu no ta permiti tardanza. E fin di siman cu a pasa por a mira atrobe cu tin algo cu no ta cana bon den garantiza suministro di coriente. Aki ta pone cada vez atencion riba e incidentenan, mientras nos mester puntra nos mes pakico nan ta tuma lugar. Por ta cu ta tardando cu ampliacion di capacidad di produccion, mientras demanda ta sigui crece? O ta problema tin cu calidad di mantencion? Riba cualkier dia no tin un produccion minimo di energia solar, mientras e compania concerni tin registra 6,5 MW di capacidad instala. Kico ta pasando? Mester warda e ministro nobo yega pa por cuminza duna contesta?

Otro aspecto di infrastructura ta e plantanan di purificacion di awa. Di berdad mester keda warda te dia algo grave sucede na Bubali, pa e ora culpa e otro cu a bay laga e actual situacion asina? E unico gobierno cu por actua ta esun actual; e otro a bay caba.

Pa bolbe na asunto di e reforma, por señala e noticia positivo di inicio di e proceso di yega na un sistema digital pa presupuesto, cu lo beneficia tur gobierno y Aruba en general. Esaki ta fruto di e colaboracion cu Hulanda den cuadro di e reforma gubernamental. Nos lo scucha comentario cu esey ta algo cu tabata prepara pa e anterior gabinete caba… Nos comentario lo ta: bon haci! Nos a spera hopi mas di un cantidad di proyecto di e Landspakket cu no a keda cla, y cu desde 2020 ta move na un velocidad milimetrico, pues tanto cos di gaba no tin pa loke ta e programa di reforma te awor.

Mas importante cu e 100 dianan inicial ta pa sigui actuacion gubernamental den accion concreto riba cada tereno. Tin cos cu ta dura mas di 100 dia pa haci nan bon. Nos lo evalua na 6 luna, un aña.