Ayera mainta oficialmente IBiSA a lansa su website nobo pa asina comparti cu comunidad informacion importante tocante e actividadnan deportivo y di salud cu nan ta haci.

Edgar Erasmus miembro di management team di IBiSA a expresa cu e meta di website www.ibisa.aw ta pa nan comparti tur e actividadnan cu nan ta haci di IBiSA, cual ta un instituto di gobierno cu ta haci diferente cos cu tin relacion cu actividad fisico y tambe nan ta promove e parti di salud.

“Nos ta haciendo hopi cos cu nos kier comparti cu comunidad y p’esey e website aki lo bay bira un media cu nos ta bay usa pa informa comunidad”, Erasmus a menciona.

Riba website hendenan por haya e historia di e departamento di IBiSA cu na aña 1976 tabatin e number di “Sportbureau”, despues na 1981 e nomber a cambia pa Instituto pa Deporte, Educacion Fisico y Recreacion (IDEFRE) ken a hunga un rol hopi importante pa desaroyo di deporte na Aruba.

Despues, IDEFRE a wordo substitui pa Instituto Biba Saludabel y Activo (IBiSA) na 2012 door di Ministerio di Salud Publico, Cuido di Hende Grandi y Deporte pa asina restaura e departamento antiguo IDEFRE, e motibo principal tabata pa extende y ahusta e tareanan di IDEFRE antiguo pa e movemento di tendencia na nivel mundial cu enfasis riba promocion di salud y estilo di bida activo.

Riba website tambe por wak cu IBiSA ta traha cu gruponan meta den cual tin actividadnan pa mucha y pa hende grandi.

Di e servicionan cu nan ta duna na comunidad Erasmus a señala cu nan ta presta material na organisacionnan cu kier crea cualkier tipo di actividadnan fisico como sportdag, team building of caredanan, tambe riba website por haya con por haci esey y e formanan cu e cual por usa pa haci peticion pa esey.

“Algo hopi importante ta cu na IBiSA semper nos tabata haya yamada di comunidad, di hende cu a bisa cu por ehemplo, nan yiu kier hunga basketball – y pa e motibo ey riba e website por haya e diferente federacionnan cu a manda nan informacion pa nos y nos a pone esaki na unda e hende por wak esey”, Erasmus a informa.

Di su parti, William Erasmus hefe di departamento di desaroyo a splica cu e website tin diferente seccion como “Sport and Physical Activity”, “Salud”, “Media/News”, “Results” and “Contact Info” unda por haya e diferente departamentonan di kico nan tareanan ta, kico nan ta haci y actividadnan cu nan ta organisa.

Tin un parti cu ta yama “Sport and Development” unda ta informa tocante proyectonan den comunidad den cual nan ta haci actividadnan na diferente bario, careranan, lecturanan, informacion y tambe nan instructornan di deporte.

Ademas, nan ta informa tocante IBiSA San Nicolas y ki tipo di actividadnan nan ta maneha pariba como e programa “Hoben Activo y Hoben Feliz”.

Di loke ta trata e seccion di departamento di Salud, Erasmus a indica cu eynan personanan por haya informacion mas tanto pa nan logra nan meta di come y biba saludabel unda tambe tin un parti cu ta duna tips pa promove y conscientisa e comunidad di Aruba.

Nan tin tambe e seccion di comunicacion unda eynan nan lo publica tur nan actividad cu potretnan, videonan y noticia di ki actividad tin riba nan kalender.

Ademas, tin un otro seccion dedica na eventonan deportivo unda por wak e kalender di tur actividad deportivo di Aruba y tambe un cu ta dedica pa eventonan di mucha “Kids and Teens”.

“E intencion ta aworaki pa bay riba e website y wak tur e actividad, pa asina ey full Aruba por usa e canal aki pa nan promove nan actividadnan deportivo, cualkier organisacion cu kier pa nos informa riba nan actividad deportivo por tuma contacto cu nos y nos lo publica riba e website”, el a bisa.

Deporte escolar tambe tin su espacio riba e website e cual ta tuma luga henter e aña pa diferente scolnan manera Erasmus a menciona asina como tambe haya ki ta bay tin pa actividadnan di mucha.

Pa nan mes, nan tin e parti di “Results” unda cu tur hende cu ta participa den tur actividad no solamente caredanan sino tambe baseball of futbol por subi riba e website y wak e resultadonan como por ehemplo si un mucha a participa den deporte escolar, otro siman e resultado ta wordo actualisa riba e website.

Pa finalisa, nan tin e pagina di “Contact” caminda si hendenan tin preguntanan of haya algun informacion specifico por manda un e-mail na IBiSA.

“Ta bay tin cosnan nobo, nos ta hopi contento cu e ta bay yuda conscientisa comunidad di kico IBiSA ta haci y tambe e ta bira mas facil pa comunidad tambe yega cerca nos y haya informacion” Erasmus a comenta.

Cu esaki, IBiSA ta sigui enfoca riba su mision cu ta pa promove un estilo di bida saludabel y activo pa asina ey preveni malesanan cronico no transmisible cu lo contribui na un miho calidad di bida, pa un Aruba saludabel y activo.