Durante un conferencia di prensa ayera mainta William Erasmus, hefe di departamento di deporte y desaroyo di IBISA, a brinda informacion tocante IBISA Kamp 2022.

E fechanan di e actividad aki lo ta di dia 18 di juli te cu 5 di augustus y esaki lo ta parti den tres diferente siman, tres diferente kamp. E prome kamp lo ta di 18 te cu 22 di juli, e di dos kamp lo ta di 25 pa 29 di juli y e ultimo lo tuma luga for di 1 di augustus te cu dia 5 di augustus.

Ayera a cuminsa oficialmente cu e registracion di e prome siman di kamp, dia 29 di juni lo cuminsa cu e registracion pa e segundo siman di e kamp y dia 6 di juli lo cuminsa cu e registracion di e ultimo siman di IBISA kamp 2022.

Erasmus ta splica cu e motibo cu nan a dicidi di haci esaki y parti e registracion den tres diferente fecha ta pa asina duna oportunidad na mas mucha pa participa. “Esey ta un feedback cu nos a haya di aña pasa, caminda hopi mucha no a haya e oportunidad di registra pa e actividadnan aki. Asina nos kier duna mas mucha e oportunidad pa inscribi”, el a bisa.

Lo tin dos localidad unda e kamp lo tuma luga cada siman y tin un maximo di 100 mucha cu lo por registra na cada localidad pa cada siman di e kamp. Un total di 600 mucha lo por participa den IBISA kamp 2022.

E prome siman, 18-22 di juli, e kamp lo tuma luga na Centro Deportivo San Nicolas y na Centro Deportivo Betico Croes. E di dos siman, 25-29 di juli e kamp lo ta na Scol Sagrado Curason na Savaneta y na Centro Hubenil Washington. E ultimo siman, 1-5 di augustus e lo tuma luga atrobe na Centro Deportivo San Nicolas y na Centro Deportivo Frans Figaroa.

“Nos coordinadornan ta druk cu e preparacionnan di e actividadnan y e temanan pa cu e kamp di e aña aki y e biaha aki nos kier a bin cu algo diferente. Nos no kier haci deporte so, pero nos kier a hinca algun otro aspecto- y temanan den e simannan di actividad”, Erasmus a remarca.

El a sigui splica cu e prome siman di kamp e tema lo ta agricultura y naturalesa, e segundo siman e tema lo ta tecnologia y ciencia y e ultimo siman lo tin como tema arts and crafts. Sin lubida e parti di sport cu ta standard den tur actividadnan di IBISA. Erasmus a menciona tambe cu manera ta custumber, e muchanan lo ta bishitando cinema y waterpark tambe durante e kamp aki.

Pa loke ta trata e cuido di e muchanan y cuanto persona lo ta encarga cu e grupo di mucha, Erasmus a informa cu semper den tur nan actividadnan nan ta parti e grupo di 100 mucha den ocho instructor, y apart di esey tin un ekipo di cinco of seis persona cu ta encarga cu e parti di material, ekipo y pa tur cos cana netjes.

Pa loke ta specificamente e bishita na waterpark, el a remarca cu henter e staff y personal di IBISA lo t’ey presente na e luga y lo wordo parti na e diferente seccion di e park pa asina tin miho bista riba e muchanan.

E kamp aki ta special pa muchanan di 6 pa 12 aña, e orario di kamp ta di 8or di mainta pa 12:30 di merdia y e prijs pa siman pa participa lo ta 25 florin pa mucha. Pa registracion por subi riba e pagina di Facebook di IBISA pa mas informacion con pa registra.

LEAVE A REPLY

Please enter your comment!
Please enter your name here