Ayera tardi a tuma luga un conferencia di prensa na unda Minister di Deporte y Enseñansa, Endy Croes, a anuncia e fechanan oficial pa loke ta Weganan Escolar (WE) Aruba 2023 y a elabora ariba e detayenan di e competencia escolar di e aña aki.

Sr. Wladimir Wolff di IBISA a hiba palabra y a splica cu na inicio di aña escolar 2022/2023 e WE Aruba a cuminsa cu e competencianan di clasificacion unda cu un total di 104 scol a participa di cual 40 scol a clasifica pa e final cu lo tuma luga for di 26 di mei pa 10 di juni.

Di e 40 scolnan aki 12 ta scol primario, 20 ta scol basico y 8 ta scolnan secundario. E deportenan cu lo participa den e weganan escolar 2022/2023 ta futbol, cuater categoria, volleyball, tres categoria y basketball, dos categoria.

Banda di esaki ta bay tin tambe beach tennis, badminton, functional fitness cual ta conoci como crossfit y tambe e baile deportivo, cual Wolff a remarca tabata e highlight di e aña pasa unda tabatin un Cas di Cultura completamente yen cu hopi animo di muchanan apoyando nan scol.

El a remarca cu e aña aki a agrega mas deporte pa e scolnan secundario ya cu ta e scolnan cu menos ta participa.

“Finalisando mi kier gradici Minister Endy pa e confiansa duna na IBISA pa forma parti di e bunita proyecto aki, cual sigur ta un exito y ta na beneficio di nos alumnonan di scol, pero tambe na Aruba en general,” Wolff a expresa.

Minister Croes a splica durante su discurso cu despues di evalua e competencianan di aña pasa, un di exigencianan di e bureau di minister ta cu nan kier trata e muchanan, e atletanan di scol riba un nivel profesional.

Algo cu a bin cune aña pasa pa a participantenan di WE Aruba 2023 ta uniform. Segun e minister a indica, nan a percura pa cumpra e uniform cu ta match e ekiponan profesional den cada deporte.

El a sigui splica cu loke nan a evalua na final di aña pasa ta cu e ekipo di coach- y refereenan tambe mester haya uniform. P’esey e aña aki 120 coach y 50 referee tambe ta bay haya uniform pa e temporada di competencianan di WE Aruba 2023.

E aña aki e apertura di e weganan escolar ta dia 26 di mei. Minister Croes a indica cu aña pasa esaki a tuma luga dia 17 di juni, pero despues di combersa cu e diferente scol cu ta participa a tuma e decision pa hala esaki pa motibo cu e fecha tabata coincidi hopi cu examennan.

Pa loke ta e competencia di baile deportivo, un competencia cu a causa un sensacion aña pasa, ta bay tuma luga dia 3 di juni. Segun e minister a indica e idea ta pa haci esaki riba Plaza Betico Croes cu ta un espacio hopi mas grandi y henter comunidad por asisti pa presencia y apoya e alumnonan cu ta participa.

Aña pasa a crea un mascota pa representa e weganan escolar y esaki tabatin e nomber “WeWe”. Minister Croes a señala cu a bin debate pa e nomber di e mascota durante e weganan na unda hopi ciudadano a bisa cu e mester ta skirbi “WiWi”, na Papiamento. Pa complace tur hende y coregi esaki den cierto forma, Minister Croes a remarca, a crea un parha mas moderno cu diferente color cu ta representa e diferente culturanan na Aruba y ta representa union

Otro aspecto nobo pa WE Aruba e aña aki ta cu a crea un bandera pa representa e weganan. E bandera aki lo ta bulando na tur e parkenan unda cu ta bay tin e competencianan di WE Aruba. El a agrega cu nan a percura tambe pa cada scol cu a clasifica tin un bandera bulando na nan scol.

“E idea di weganan escolar a lanta hopi tempo atras y tabatin un momento cu esaki no a continua. Nos a pone den un bachi excepcional nobo. Loke nos kier demostra ta cu deporte ta un vehiculo cu ta trece hende hunto. Deporte ta un vehiculo cu ta unifica un nacion y un pueblo. Deporte ta un vehiculo cu ta crea un disciplina, un caracter di cada conciudadano y a traves di deporte, nos ta percura pa haci inversionnan necesario y asina duna nos contribucion pa desaroyo di Aruba den su totalidad,” Minister Croes a enfatisa.