(AP) – Hulk Hogan, talbes e showman mas reconoci den lucha profesional pa su musculonan grandi, cabey blond largo, y su mustashi, a fayece. E tabatin 71 aña di edad.
Hogan, kende su nomber di nacemento tabata Terry Bollea, tabata e strea mas grandi di WWE y un actor cu un tempo tabatin su propio show di reality, “Hogan Knows Best.” El a muri ayera na Clearwater, Florida, unda e tabata biba.
Cantidad di famoso a inunda rednan social cu tributo pa Hogan.
Presidente Mericano, Donald Trump a bisa: “Nos a perde un gran amigo awe, e “Hulkster.” Hulk Hogan tabata MAGA completamente – fuerte, duro, sabi, pero cu e curason di mas grandi. El a duna un discurso absolutamente electrico na e Convencion Nacional Republicano, cu tabata un di e highlights di henter e siman. El a entretene fanatico for di henter mundo, y e impacto cultural cu e tabatin ta masivo. Na su esposa, Sky, y famia, nos ta duna nos bon deseonan di mas caluroso y amor. Nos ta bay haya un gran falta di Hulk Hogan!”
Vice-presidente JD Vance a skirbi riba X: “Hulk Hogan tabata un gran icono Mericano. Un di e prome hendenan cu mi a admira berdaderamente tempo mi tabata mucha. Ultimo biaha cu mi a mir’e nos a priminti cu nos lo bebe un cerbes hunto otro biaha cu nos mira otro. Otro biaha ta bay tin cu ta otro banda, mi amigo! Sosega na paz.”
Vince McMahon, co-fundador di WWE, a bisa den un declaracion: “Mundo a perde un tesoro awe. Hulk Hogan tabata e Superstrea mas grandi den henter historia di WWE, un persona cu tabata stima y admira rond mundo. E tabata un ‘trailblazer’, e prome artista cu a transiciona di ta un strea di lucha den un fenomeno global.”
Hogan a keda pronuncia morto den un hospital menos di 90 minuut despues cu dokternan na Clearwater a yega su cas respondiendo na un yamada tocante atake di curason, polis a bisa. “No tabatin señal di crimen of actividad sospechoso,” maj. Nate Burnside a bisa reporteronan.
Hogan tabata talbes e strea mas grandi den e historia largo di WWE. E tabata e atraccion principal di e prome WrestleMania na 1985, y tabata un figura central pa añas, enfrentando tur hende desde Andre the Giant y Randy Savage te The Rock y hasta Vince McMahon.
Hogan a gana al menos seis campeonato WWE y a keda introduci den e WWE Hall fo Fame na 2005. Peleanan di WWE awo ta tuma lugar den stadion di sport profesional y miyones di fanatico a mira e programa di television en bibo di e compania cada siman, “Raw”, cu tabatin su debut januari riba Netflix.
El a pasa den pelicula y television tambe. E tabata Thunderlips den e pelicula “Rocky III” na 1982.
Na 2016, un hues di Florida a otorga Hogan $115 miyon den un demanda contra Gawker Media y despues a agrega $25 miyon den daño castigable. Hogan a demanda despues cu Gawker na 2012 a post un video di e haciendo sex cu esposa di su ex-miho amigo. El a bisa cu e post ta viola su privacidad.
Pero tabatin otro consecuencia di e caso den corte. Pa un tempo, WWE a kibra laso cu Hogan, despues cu a keda reporta cu el a usa insulto racial den e grabacion. Hogan a disculpa y a bisa cu su palabranan tabata “inaceptable.”
Durante e huicio di tres siman, Hogan a smile y bisti na preto. “Tur caminda unda mi bay, hende ta trata mi como cu ainda mi ta e campeon,” el a bisa tocante e sosten di fanaticonan.
