Hopi rumor y speculacion tabata circula riba rednan social y den comunidad local, despues di e incidente diadomingo anochi den cual un pareha a perde su bida, birando e prome y di dos morto den trafico pa 2026. E hecho cu inicialmente autoridadnan no a duna inicial di e sospechoso a duna espacio pa comunidad mes busca pa haya sa identidad di e chauffeur.

Mientras tanto, hopi rumor tabata circula riba rednan social tocante identidad di e sospechoso, cual un cantidad di usuario a identifica como C. Fernandes, un muhe hoben, yiu di un conocido doño di negoshi na Aruba. Medionan local ayera a cuminsa circula e informacion cu Fernandes, 24, en berdad ta e sospechoso den e caso, cu e ta detenido, y cu e lo mester presenta dilanti hues diahuebs awo. Bon Dia Aruba a manda pregunta na vocero di polis, Liliana Rasmijn y vocero di Ministerio Publico, Ann Angela, pa pidi confirmacion di e identidad di e sospechoso, pa evita speculacion. Tambe a puntra si por a confirma si e sospechoso ta den detencion ainda.

“E sospechoso ta deteni ainda. E lo wordo hiba dilanti Hues Comisario diahuebs,” Angela a contesta. El a agrega cu “OM lo pidi pa prolongacion di su detencion. Ta na Hues Comisario pa dicidi.”

Manera Cuerpo Policial a informa mediante un comunicado di prensa, tabata diadomingo pa 11:58pm cu Central di Polis a keda notifica di un accidente pisa na L.G. Smith Boulevard, na haltura di Wind Creek Casino. Reportahenan inicial a indica cu tabata un auto modelo SUV color preto a dal dos peaton, y despues a sigui core y bandona e sitio.

Na yegada di ambulance, ya no por a haci nada mas pa e victimanan, kende a keda identifica como Josely Paulina Vasquez Gonzalez, naci 09-07-1960 na Republica Dominicana, y Carlos David Vialez Valerio, naci riba 19-10-1971 na Republica Dominicana.

E caso a crea conmocion pa motibo di e brutalidad di e incidente, y hopi tabata puntra den ki estado e chauffeur lo mester tabata, of con duro e tabata core, cu por a mata dos persona di un manera asina.

Mientras cu Cuerpo Policial a indica cu a detene e sospechoso na Bushiri, y cu tabata trata di un chauffeur femenino, no a duna un inicial ni mas detaye.

Esaki, combina cu e seriedad di e incidente, a pone cu comunidad local mes a cuminsa busca manera di haya sa identidad di e sospechoso.

Yiu di Vasquez Gonzalez, un di e victimanan, den su dolor a comparti un video riba rednan social den cual tabata exigi husticia pa e incidente. Sinembargo, den su estado emocional vulnerable el a haci algun menasa – cu despues el a hala atras. Ayera el a comparti otro video riba rednan social pidiendo hende pa no punta dede, pero reiterando su yamado pa husticia. Tambe el a desmenti cu famia di e sospechoso a ofrece di paga gastonan di entiero di e victimanan, un detaye cu a keda reporta den medionan local, pero cu e yiu a bisa no ta berdad of al menos, e no a tende nada di esey.