Arkeologonan Israeli a revela un iglesia Bizantino elaboradamente decora, dedica na un martir anonimo, cual a ser descubri recientemente cerca di Jerusalem.
Autoridad di Antiguedad Israeli a mustra algun di e hallazgo for di e structura casi 1,500 aña bieu ayera, despues di tres aña di excavacion. E hallazgo lo ser exhibi na e museo Bible Lands na Jerusalem.
Un inscripcion den un mosaico ta bisa cu a construi e sitio den honor di un ‘martir glorioso’. E martir no ta identifica, pero otro inscripcion ta conmemora expansion di e imperio bou di Justinian den siglo seis, y un di su sucesornan, Tiberius II Constantino.
Pa motibo di e tamaño y decoracion rico di e iglesia, investigadonan di Autoridad di Antiguedad Israeli ta kere cu e tabata un sitio popular pa peregrinonan, te ora el a ser abandona durante e califato moslim Abbasid, den siglo 9 AD.
E diseño elabora di e iglesia, incluyendo un mosaico riba vloer di un aguila, simbolo di Imperio Bizantino, ta demostra e fundacion notabel di e iglesia y su significado.
Director di excavacion, Benjamin Storchan, a bisa cu e excavacion ta resalta un fenomeno conoci como ‘construccion imperial di iglesia’. El a bisa cu e imperio tabata duna mantenemento na sitionan importante y tabata sostene un industria turistico. “Nan a tuma parti den sigura e desaroyo di rutanan di peregrinahe”, el a bisa.
A descubri e sitio durante construccion di un bario residencial nobo. E ta cubri 1,500m2 y ta inclui un patio y e iglesia estilo basilica.
Despues di e collapse di Imperio Bizantino, entradanan na e iglesia a ser cera y tapa cu piedranan grandi, cual excavadonan a habri y a haya lampi di glas, mosaico y un pida di un boveda unda e martir misterioso tabata dera.
