Reformacion ta e palabra clave cu Fondo Monetario Internacional, IMF a usa den su analisis pa Aruba pa 2021. E mision di IMF a presenta resultado di su analisis dia 21 di April y ta enfoca riba e realidad di COVID-19, pero tambe e riesgonan financiero grandi cu Aruba ta confronta.

E conclusion ta cu COVID-19 a causa un destruccion sin precedente den actividad economico, cu a hinca Aruba den e recesion economico mas grandi di su historia. Pero tambe cu e reaccion a base di maneho tabata rapido. E hecho cu turismo a para completamente durante e di dos kwartaal di 2020 a causa efectonan den henter economia y ta calcula cu e caida di GDP ta 25.5 porciento na 2020, cu a pone un presion considerabel riba mercado laboral y sector comercial. Banco Central di Aruba a crea facilidad den e maneho monetario y macroprudencial, unda a sostene credito priva apesar di e contraccion di produccion.

E paquete fiscal amplio a percura pa sosten di liquidez y entrada esencial pa negoshi y famianan y a yuda contene bancarota y desempleo. Sinembargo, e maneho di gasto pa sosten y perdida grandi di entrada a pone cu e balance fiscal di un surplus chikito na 2019 a bira un deficit di 17 porciento di GDP na 2020. Como resultado di un contraccion profundo di GDP y un deficit grandi, debe publico a aumenta di 72 pa 117 porciento di GDP. Ta proyecta un recuperacion modera pa 2021, memey di riesgonan halto. Crecemento real di GDP ta anticipa di ta 5 porciento na 2021, y ta sosteni pa e capacidad halto di test y prospectonan di vacuna, si compara cu otro paisnan di Caribe. E pandemia sinembargo lo tin efectonan duradero riba economia, cu por yega na nivel pre-COVID te na 2025. IMF ta conclui cu e deficit fiscal lo keda eleva na 2021, y ta refleha e gasto di sosten continuo y debilidad persistente di entrada di belasting. Debe publico lo yega un peak di 130 porciento di GDP na 2021, y lo baha gradualmente e siguiente añanan.

E ahuste financiero necesario a termino medio pa restora sostenibilidad di debe ta hopi grandi, hasta a base di standard historico y internacional.

Manera otro pais, riesgonan di mas caida economico ta predominante y ta bin pa motibo di e evolucion insigur di e pandemia. E riesgonan di implementacion pa e ahuste fiscal necesario y riesgo pa sostenibilidad di debe tambe ta halto, pero ta mitiga parcialmente danki na e parti grandi di obligacion na Gobierno Hulandes.

Mester sigui cu sosten na 2021

E reaccion di maneho rapido di parti di autoridadnan riba e pandemia COVID-19 a yuda contene e daño na hende y na economia. E paquete fiscal amplio pa percura pa sosten di entrada temporal, subsidio di salario, asistencia di liquidez, y medidanan di aplaza pago di belasting. Y Banco Central a facilita pa sector bancario por a yuda cu liquidez. E medidanan aki tabata instrumental pa scapa bida y preveni un caida mas skerpi ainda. E sosten di maneho ta keda critico pa contene efecto di e pandemia, mirando e recuperacion lento proyecta pa 2021. E decision pa extende sosten fiscal na 2021 ta apropia, den bista di debilidad economico continuo y riesgonan eleva. Reduccion of eliminacion prematuro di e pasonan aki lo por afecta recuperacion y lo por costa economia mas ainda. Autoridadnan ta encurasha pa prepara un plan di contingencia en caso cu condicionnan actual persisti, incluso extension di un tipo di sosten fiscal te cu 2022, si por identifica fuentenan di financiamento.

Introduci VAT

IMF ta bisa Gobierno cu mester pone prioridad den loke ta gasta y mobilisa entrada. Ambos ta necesario na momento cu economia cuminza recupera, pa asina contene e riesgonan di sostenibilidad di debe. Medidanan di gasto mester ta dirigi na famia y negoshi cu ta den necesidad urgente, dentro di un cuadro di esfuerzo general pa mehora eficiencia di gasto total.

Y IMF ta bisa cu mester tuma e medidanan pa mehora cumplimento cu pago di belasting, ya cu esaki lo amplia e base di belasting, unda alavez ta reparti e peso riba henter economia. E introduccion di e Value Added Tax, VAT, mester bin di forma acelera pa compensa e caida di entrada cu ta consecuencia di reduccion di belasting directo, mientras cu ta proteha esnan vulnerabel como tambe eleva eficiencia.

Crea cushinchi fiscal

Riba termino medio, Aruba mester di consolidacion fiscal substancial y duradero pa recobra sostenibilidad y reconstrui e cusinchi fiscal. Un plan consolida confiabel, cu ta dirigi na crecemento y inclusion a termino medio lo ta esencial pa percura cu debe publico drenta un trayectoria di baha. Elementonan crucial por inclui: mehora e sistema di belasting pa hisa entrada mientras cu ta minimalisa distorcion y proteha gruponan vulnerabel, contene e gasto di salario publico, y reforma e cuadro di seguridad social.

Reforma structura exhaustivo ta elemental pa diversifica economia y stimula crecemento potencial. COVID-19 a mustra e urgencia pa pusha esfuersonan pa diversifica pa asina contene volatilidad relata na turismo y catalisa crecemento. A termino corto, IMF ta kere cu cambia di modelonan di turismo cu tin un densidad mas abao lo yuda reduci heridanan permantene ademas cu por limita e impacto negativo riba medio ambiente.

Reforma di mercado laboral cu ta fomenta flexibilidad cu potencialmente lo por yuda economia tambe y mehora competitividad externo. Mescos cu e landspakket, IMF ta bisa cu mester fortifica e lazo entre educacion, entrenamento, y demanda di capacidad y amplia e acceso na infrastructura digital. E pasonan aki lo reduci e impacto a termino largo di COVID-19, particularmente memey di trahadonan cu no tin e preparacion amplio y ta mas vulnerabel. E reforma aki ta necesario pa alivia desigualdad y fomenta crecemento equitativo. Manehonan cu ta trata cu desigualdad y ta fortifica resiliencia pa risiconan cu cambio di clima ta trece cu n’e tambe mester sigui haya atencion, como tambe e reformanan structural cu ta mehora e ambiente empresarial, incluso medidanan di anti-corupcion y labamento di placa.

Bon Dia Aruba a tuma contacto cu Minister di Finanzas Xiomara Maduro riba e recomendacionnan di IMF. Te cu ciere di nos edicion no a haya contesta riba e diferente preguntanan.