Den e ultimo añanan a mira un crecemento fuerte den e sector di Deporte, tanto riba nivel internacional como nivel nacional. Por mira cu instancianan ta poniendo mas atencion y recurso riba facilidadnan deportivo y ta fortaleciendo sosten pa atletanan local. Hasta residentenan ta dunando di nan parti den e esfuerso pa engrandece nos facilidadnan den bario, di e manera aki stimulando desaroyo y creando un sentido di conexion comunitario.
Riba nos isla nos conoce varios club di deporte, mayoria di cual tin decadas den existencia y ta mira diferente generacion di miembro, por ehempel welonan cu a hunga den nan infancia cu awor mira nan nietonan tambe forma parti di e club. Di e manera aki, clubnan deportivo, entre otro, ta hunga un rol importante den conexion familiar y comunitario. Sinembargo, den temponan recien por sinti cu nos ta perdiendo e conexion aki den mesun tempo cu ta mira mas y mas club keda inactivo pa hopi tempo of ta desmantela completamente. Cu esaki ta bin e consecuencianan cu veldnan di e clubnan aki ta degrada y ta keda perdi den memoria.
Actualmente tin varios veld cu ta den estado di degradacion. Reportera di Bon Dia Aruba a bay investiga varios veld riba e isla pa observa e nivel di degradacion y a nota cu veldnan den cierto bario no tin luz, tin bankinan bieu y kibra, casitanan di palo kibra y e tereno ta yena cu yerbe y mata cu a haci e veldnan nan hogar durante añanan cu a pasa. Aunke tin deportistanan cu ta usa esakinan asina mes, e ta crea un bista desagradable, specialmente pa personanan cu tin memorianan stima hungando riba e veld of participando den actividadnan di clubnan deportivo. Tambe e ta demostra e falta di atencion pa mantene nos facilidadnan limpi y ekipa cu recursonan basico.
Di otro banda, por nota cu ya tin esfuerso andando pa eleva e veldnan aki y asina trece bida den e sector deportivo atrobe. Durante e ultimo añanan a anuncia esfuersonan pa revitalisa e stadionnan riba nos isla.
Na juni 2021, ex-minister di Deporte Dangui Oduber a anuncia cu lo tin renobacion di Stadion Guillermo Prosperidad Trinidad na Dakota, cual lo inclui entre otro un turf nobo, un atletiekbaan nobo y luznan LED. Un idea positivo cu ya a mira e instalacion di algun recurso (incluyendo esnan menciona) pero cual ainda no ta cla pa via di loke ta parce problemanan administrativo y segun minister di Deporte actual, mr. Gerlien Croes, transparencia den kico tur ta tumando luga y falta di liderazgo den e proyecto.
No obstante, e desaroyonan cu tin caba ta mustra prometedor y ta motiva mas accion den sector di Deporte. Esaki ta inclui facilidadnan mas chikito, manera varios veld di futbol cu a haya luznan LED nobo. Na mei, gobierno a anuncia cu lo continua cu e proyecto aki, otorgando luznan pa RCA, Riverplate y Nacional. Tambe a mira algun centro di bario cu a haya renobacion, manera centro di bario Dakota, cas di e club campeon, cu a logra haya turf nobo den 2024. Na februari di e aña aki, FCCA a anuncia cu Madiki Kavel lo mira un renobacion di su sportveld, cual lo inclui yerbe artificial nobo, luznan nobo y un mehoracion di e infrastructura di e veld, entre otro, pa asina duna residente y bishitantenan un espacio deportivo moderno y sigur.
Ta parce cu San Nicolas tambe ta hayando su merecido atencion, unda a observa cu e cancha di tennis na Sero Colorado finalmente ta bao renobacion despues di a keda para pa añas den mal condicion. Actualmente por mira cu ademas di renoba e cancha existente, awor tin un cancha mas cu bishitantenan di Baby Beach lo por pronto haci uso di dje. Di otro banda a bin un otro observacion den e area: Aunke ta renobando e cancha di tennis aki, esun mas pariba dilanti e condominionan ainda ta completamente bandona y den hopi mal condicion. No por bisa cu certeza pakico un banda si ta haya e atencion cu mester, pero e otro no. No por asumi sin confirmacion di autoridadnan si esaki ta conecta cu e apertura di e Secrets hotel nobo, aunke ta natural pa cuestiona pakico despues di tanto aña, awor ta dicidi pa renoba e cancha, specialmente mirando e renobacion recien di Roger’s Beach y e caminda den direccion di e hotel nobo. No obstante, mehoracion di facilidadnan publico semper ta bon bini y por spera cu lo beneficia e comunidad Arubano.
Sinembargo, ainda tin varios veld cu ta keda den mal condicion. Veld di Club Universal na Pos Chikito, por ehempel, tin tempo ta cayendo den degradacion. Aunke e veld a mira desaroyo prometedor manera un stupi pa peatonnan haci uso di dje y luznan nobo, atrobe e ta mirando un abandono. Awor por nota cu e veld ta yena cu yerbe y no ta ser usa mucho mas pa wega of actividadnan deportivo.
Kico comunidad mester por haci?
Mirando cu e tipo di facilidadnan aki ta forma un parti integral den comunidad, ta importante pa nos tambe cuida loke ta di nos. Un bon ehempel pa haci esaki ta pa participa como boluntario pa Aruba Doet. E organisacion aki ta uno conoci caba pa nan trabaonan boluntario den diferente comunidad, incluyendo verf scol, limpia nos playanan y hasta yuda restaura y limpia facilidadnan publico manera veldnan di futbol. Pa ta un boluntario ta un bon manera pa contribui—ni maske con chikito e por ta—den mantene nos facilidadnan y yuda crea espacio pa e comunidad local por florece.
Tambe ta importante pa sigui stimula sentido di conexion comunitario por medio di haci uso continuo di e veldnan aki. Esaki no mester ta specificamente algo deportivo, e por ta actividadnan recreacional manera ferianan, anochi di pelicula of otro tipo di actividad cu por trece comunidad hunto. Asina nos por sigura cu e memorianan di pasado no bay perdi, y alabes crea memorianan nobo cu e futuro generacion por sigui carga.
