Incertidumbre pa futuro di rotonde

Manera ta conoci, siman pasa a DOW a dicidi di habri e crusada di caya Frans Figaroa bek pa motibo cu ta stroba cura di un persona cu ta biba cerca di e area unda ta trahando e rotonde. Bon Dia Aruba a puntra DOW si lo tin pensa di habri e caminda aki, of kico ta e siguiente proceso cu e rotonde, mirando cu a cera e caminda 5 di april y a bisa cu e trabou lo tabatin un duracion di 2 luna.

Segun e keho di e persona cu ta biba cerca, e construccion ta afecta su cura di cas y tambe un bisiña a bisa cu auto tabata pasa mucho cerca di nan cas. Ki tempo lo por cera e caminda bek y continua cu e construccion di e rotonde, no ta sigur aworaki, segun DOW.

Un di e motibonan pakico a opta pa habri e caminda bek, mientras cu ta resolve e asunto cu bisiñanan ta cu trafico mester a desvia via Boegoeroei y e parking lot di e stadion y tabata crea un situacion peligroso cu riesgo halto di ocasiona accident cu hende of mucha cu ta eynan ta cana of hunga.

Pero e realidad ta cu a stop door cu e rotonde en cuestion lo a cay den e tereno di e persona. E informacion cu tin ta cu e construccion a stroba e cura di e bisiña. E persona cu a haci e denuncia tin su cura mas cerca di e caminda cu e resto di e casnan. Pa tal motibo, DOW ta investigando e keho, pa mira si ta cuestion cu e persona a traha su cas demasiado cerca di e caminda, esta cu el a pasa over di su tereno.

E otro opcion ta cu en berdad DOW lo a stroba cura di e persona, den cual caso nan no tin derecho y lo busca un solucion. Segun DOW, te ora nan investiga si ta e persona a traha su cas malo of ta un fout di DOW mes, no por bisa kico lo por ta e siguiente stap.

Un pensamento cu DOW tin ta pa cera e caminda y trafico bay riba e highway. Chauffeurnan lo tin cu core un tiki mas pa por yega nan destino, segun DOW ta splica. Nan ta conseha pa ora hende core y wak cu un caminda principal ta cera, mester subi un caminda mas fini. Nan ta indica pa core di un manera responsabel, pa evita accident cu mucha cu ta core bais of persona cu ta cana pa yega nan cas.

E rotonde lo tin e forma chikito di ‘turtuga’ cu ta parce esun manera di Banco di Caribe. E construccion, segun DOW, tambe lo a cay riba un parti di e parkeo di e stadion Frans Figaroa. E departamento no ta sigur ki ora nan ta bay sigui cu e construccion, pasobra no tin informacion kico ta e siguiente paso.

 

You May Also Like

84 porciento di adultonan ta feliz na Aruba

En conexion cu e celebracion di dia Internacional di Felicidad, dia 20 di maart ...

Smac2017 40.jpg

SMAC cu directiva nobo

– Dia 8 di november, Stichting Maneho di Aruba su Carnaval (SMAC), a tene ...

Microalgae Pilot Plant cu apertura oficial

Recientemente a tuma luga e apertura oficial di e proyecto di cultivo di microalgae. ...

pionero di renta car a fayece.jpg

Pionero den negoshi di auto di huur na Aruba sr. Enrique Trimon a fayece

Diadomingo marduga a fayece, Sr. Enrique Trimon, director gerente di National y Alamo Car ...

image.jpeg

Abogado Anthony Ruiz a defende MEP den corte contra Gerick Croes

“Sr. Gerick Croes a cuminsa un caso di rectificacion contra MEP y avance riba ...

Hulanda lo goberna St. Eustatius pa motibo di mal gobernacion

Hulanda ta tuma over e gobierno di isla St. Eustatius, lo disolve parlamento anto ...