Incertidumbre riba nombramento di abogado di Corsou pa defende gobierno den caso di De Meza

Mientras cu comunidad ta na expectativa pa e prome audiencia den Corte di e caso di parlamentario Mike de Meza (AVP) contra DIMP, relaciona cu su screening pa bira minister, desaroyonan den ultimo dianan a hala atencion y a causa confusion. E biaha aki, relaciona cu e supuesto escogencia di abogado pa representa Gobierno den e caso.

Tur cos a cuminsa na momento cu portal online, 24ora a reporta cu un abogado specialista di Corsou, mr. Mirto Murray, den un carta manda na corte, lo a presenta su mes como e abogado di gobierno pa e caso di De Meza, indicando cu De Meza no tabata contento cu e desaroyo aki, y cu e situacion lo bira un problema.

Mientras tanto, noticiero local NoticiaCla a reporta cu diamars a haya informacion cu “localmente tabatin lobbymento formal entre abogadonan” pa tuma e caso pa defende DIMP den corte, pero ningun tabata exitoso. Esaki pasobra ta abogado Curasoleño, mr. Murray lo a keda scogi pa representa e departamento den corte.

Confusion
E confusion a surgi na momento cu gobierno a nenga cu a contrata e abogado di Corsou pa e caso.

A pesar cu medionan local a reporta cu mr. Murray a presenta su mes como abogado pa DIMP na Corte, declaracionnan di minister di Finanzas, Geoffrey Wever (Futuro), bao ken e departamento di DIMP ta cay y kende lo mester ta na altura di tur suceso relaciona cu e caso, a bisa cu e no tabatin conocemento di e desaroyo aki.

Segun minister Wever, ni su persona como minister, ni Conseho di Minister a duna aprobacion pa contrata un abogado di Corsou pa e caso aki. Sinembargo, su declaracion a hala atencion na momento cu el a bisa cu lo ta normal den un caso asina pa gobierno busca un abogado di exterior, mirando cu ta trata di un caso sensitivo, y principalmente si ta un abogado cu ta experto den e materia. Y segun e minister, mr. Murray ta un experto den e materia.

Wever, den declaracionnan na 24ora, a bisa: “No tin ningun decision di Ministerraad pa engage ningun abogado di afo pa representa gobierno den e caso cu Sr. De Meza a entama contra Gobierno di Aruba.”

El a confirma cu normalmente, e departamento lo mester pidi aprobacion di minister di Finanzas prome. “Esey ta e proceso cu semper ta encamina, cu ta pidi e minister encarga si ta bay di acuerdo pa besteed uit un caso huridico na un oficina di abogado, ta usual.” Pero den e situacion aki, Wever a bisa, “a bin un peticion pa preparacion di gobierno, den e caso aki pasobra tin un caso cu a wordo entama, y gobierno den tur caso mester asesora, y evalua con e ta defende su mes.”

“Pero cu gobierno a dicidi cu ta bay laga un oficina di afo defende gobierno, esey no ta berdad. No a dicidi riba esey, y tampoco a hiba e decision aki Ministerraad,” Wever a declara.

Na momento cu a cuestiona Wever riba si mr. Murray a manda un carta anunciando cu e ta e abogado pa e caso aki, Wever a bisa: “Mi mester bay wak esey, pasobra manera mi a menciona, pa bo engage un abogado mester tin un engagement letter firma, mester tin un understanding oficial cu un persona ta representa gobierno den un caso, cu e por stel su mes den nomber di un cliente. Y esey, mi no a duna un autorisacion pa esey.”

Sinembargo, abogado di De Meza, mr. Croes si a confirma pa NoticiaCla cu mr. Murray, kende ta specialisa den entre otro, ley fiscal, ta asigna como abogado pa e caso. “Si, 100%. Awe tardi e la stel su mes como gemachtigde di inspecteur!” mr. Croes a sigura NoticiaCla.

E abogado a aclaria cu loke kiermen cu ‘stel su mes’ ta e momento unda un abogado ta informa cu e lo hiba defensa pa un cliente. “E la informa Corte awe cu e lo ta e abogado di Inspecteur der Belastingen.” Croes tambe a confirma cu el a mira e carta en cuestion, bisando cu “como abogado di Mike de Meza mi mester wordo informa di biaha cu e tin un abogado na e otro banda. Semper ta asina.”

Critica
E situacion a hala masha hopi atencion den esfera politico di Aruba, mirando cu no solo ta trata di un caso hopi importante, sino tambe tin falta di claridad riba ken precies a aproba pa mr. Murray representa gobierno den caso di De Meza.

Hopi hende ta mira e hecho cu gobierno lo a busca un abogado experto di Corsou como un indicacion di con fuerte ta para pa defende DIMP den e caso, y algun ta cuestiona si esaki ta nifica cu tin discordia profundo den e coalicion den gobierno.

Sinembargo, mester nota cu e caso aki tin repercusion enorme no solo pa Sr. De Meza, ken su futuro como minister ta riba balansa, sino tambe pa e departamento di DIMP, unda su reputacion y su autoridad ta den linea. Por ehemplo, si De Meza gana su caso, e lo crea un jurisprudentie cu lo por tin consecuencia pa otronan den comunidad. Gobierno mester boga pa interes di pueblo, no interes di politico.

Y politiconan di otro partidonan ta mirando e situacion di cerca, ya cu tin hopi cuestionamento pa cu e situacion di De Meza.

Algun dia atras, lider di PPA, Otmar Oduber Oduber a critica e hecho cu e tardanza aki den nombra un di 7 minister ta tumando demasiado largo y ta creando un iresponsabilidad pa tin un gobierno competente pa atende cu e responsabilidad cu un gobierno digno mester por asumi, manera el a expresa den un comunicado di prensa. El a nota cu ya ta bay pa 6 luna cu e resultado di eleccion ta conoci y ainda gobierno no por caba di keda completa pa asina asumi su responsabilidadnan.

Segun Oduber, “loke ta tumando lugar aki cu e nombramento di e di 7 minister ta un wega y uno hopi sushi. E ley di screening di minister, di acuerdo cune of no, ta hopi duidelijk y ta stipula exactamente kico e formadornan por a haci y kico no. E ley ta bisa den un di su articulonan cu for di e momento cu un di e consehonan ta negativo riba un candidato pa minister, cu esaki no por wordo presenta na Gobernador. Tambe e mesun ley aki ta stipula e responsabilidad y deber di e formadornan pa notifica por escrito e candidato pa minister cu no a pasa e screening. Aki e prome wega a tuma lugar y Gerlien Croes cu a sigura De Meza cu e no lo bira minister a cumpli cu su palabra, mientras Mike Eman a keda den silencio.”

Oduber a continua bisando cu “ta hopi bisto y awor hasta proba cu [vice-prome minister, Sra. Gerlien Croes] no kier De Meza como minister pa motibo di e forma con Gerlien a wordo trata den AVP pa De Meza y rason pa cual e la bandona e partido berde. Di otro banda tambe ta hopi bisto y awor proba cu Mike Eman a scoge pa para banda di Gerlien y Geoffrey pa laga De Meza cay manera patia berde scur, a costo cu e ta mantene su mes den e stoel di Prome Minister.”

Expectativa

Mientras tanto, tin hopi expectativa pa e caso cu ta bay presenta den corte diaranson proximo, unda finalmente lo por scucha di banda di DIMP precisamente kico ta e motibo cu De Meza no a pasa su screening. Te awo, e departamento di Impuesto no tabatin mag di bisa su banda di medaya, pasobra e proceso di screening ta rekeri discrecion. Sinembargo, den corte, DIMP lo mester duna cuenta pa su decision, y esaki lo bira e prome biaha cu pueblo di Aruba lo tin claridad riba kico precies ta e motibo cu De Meza no a pasa e screening pa bira minister di AVP.