Incertidumbre tocante legalidad di Airbnb na Aruba

Recientemente, e topico di cas y apartamento na Aruba cu ta huur pa estadia temporal na turista, riba plataformanan manera Airbnb, tin hopi atencion di pueblo. Mientras ta sugeri cu e doñonan di e propiedadnan aki mester paga nan ‘fair share’ y ta cuestiona nan impacto riba e mercado di vivienda local, keto bay e legalidad di e actividad economico aki ta keda den duda.

Informacion cu a yega mesa di Redaccion di Bon Dia Aruba ta indica cu tin algun doño cu ta huur nan propiedad temporalmente pa turista, cu kier legalisa nan negoshi, pero na momento di aplica pa permiso como negoshi, esaki ta ser nenga. Mientras cu tin algun propiedad cu si a haya nan permiso pa opera como vacation rental, otronan no a haya nan permiso. Entre tanto, tampoco por papia cu tin un moratorio riba permiso pa huur riba plataformanan manera Airbnb tampoco, creando asina un ambiente di incertidumbre entre e doñonan di propiedad aki.

Mientras tanto, si ta spera cu e negoshinan aki lo mester contribui cu paga impuesto.

Den pasado, Bon Dia Aruba a puntra CEO di AHATA, Tisa Lasorte, tocante esaki.

LaSorte a duna di conoce cu en berdad tin negoshi di e tipo aki na Aruba. Esaki ta creciendo, mirando cu tin mas apartamento. A cuminsa huur camber riba Airbnb, y awo tin apartamento traha den e cura di cas of ta crea un mini hotel, LaSorte a bisa na 2020.

“Si e ta un competencia mi no sa si ta berdad, pasobra ta diferente turista cu ta bin Aruba. Tin esunnan cu ta keda hotel pa ta mas cerca di beach”, LaSorte ta comenta. Sinembargo e ta bisa cu for di asiento di avion, nan sa cuanto turista ta dicidi di keda na un apartamento of hotel.

LaSorte ta bisa si cu crecemento di negoshi ta bin dilanti. Nan ta keda bisa cu tin un preocupacion pa sigura pa tur negoshi paga impuesto, manera cu resto di hotel ta paga.

“E ta fuerte pasobra tin un 25% di persona cu ta keda na Airbnb of apartamento; anto si wak cu mercado ta creciendo. Mester un strategia pa sa kico ta dicidi y sigura e accion cu lo tuma pa duna resultado di locual ta pidi p’e.”

Loke lo spera cu e negoshinan aki mester paga, ta toeristenheffing y BBV (Bijzondere Belasting Verblijf).
Segun Departamento di Impuesto di Aruba, si ta huur un camber di hotel of di estadia, of timeshare y ta ricibi placa pa esaki, ta obliga di paga e BBV. Ta considera un “camber di alohamento” tambe un apartamento, un vivienda of cualkier tipo di alohamento cu ta huur comercialmente of di manera priva na turista. Por ehemplo, si ta huur un apartamento riba bo cura na turista, tambe tin obligacion di paga e impuesto aki. No ta importa na cuanto turista ta huur e apartamento. E idea ta cu ta cobra e impuesto aki na e turista, y despues ta paga e placa na DIMP.

Si e huesped ta un residente di Aruba y ta inscribi den e Registro di Poblacion di Aruba, no mester paga e BBV.

DIMP ta splica ademas cu si ta ofrece huur un espacio na turista, ademas di BBV mester paga e impuesto turistico.

Sinembargo, e pregunta ta keda, con por cobra impuesto na un negoshi cu no ta registra, y esencialmente ta operando ilegal? Es decir, si no ta duna permiso pa e negoshinan aki opera segun ley, con por bira cobra nan impuesto y heffing? Na prome instante mester bin cu un maneho pa regula e industria aki, y tanten cu no tin esey, no por habri e opcion pa cobra e negoshinan aki mescos cu hotel.

Bon Dia Aruba a tuma contacto cu minister di Asunto Economico, Geoffrey Wever, puntrando tocante e maneho di permiso pa Airbnb, y puntrando si tin un moratorio riba permisonan aki. Sinembargo, te ciere di e edicion aki, no a ricibi ningun contesta.