(NLTimes)—Pasaheronan cu ta uza transporte publico regional na Hulanda diaranson mester anticipa retraso y cancelacion di trein y bus, debi na un welga nacional den transporte publico regional. Sinembargo, companianan di transporte a declara diamars cu ainda no ta cla exactamente cuanto impacto e welga lo tin.
Sindicatonan FNV y CNV a anuncia diabierna cu empleadonan lo welga un dia pa siman te Pasco, debi na un conflicto relaciona cu e acuerdo colectivo di trabou.
E prome welga lo tuma luga diaranson y lo afecta companianan manera Arriva, EBS, Qbuzz, Transdev y Keolis.
Keolis a declara diamars cu algun trein y bus lo sigui opera, pero ainda no ta cla exactamente cua rutanan lo ta disponibel.
“No tur hende tin intencion di participa den e welga,” un vocero a declara.
Qbuzz tambe a indica cu su servicio ta depende di cua empleadonan ta dispuesto pa traha. Segun e compania, e orario no lo ta cla te “comienso di e servicionan”.
Connexxion, Arriva y Transdev tampoco no sa ainda cuanto bus y trein lo keda circula.
EBS a conseha pasaheronan pa anticipa “cancelacionnan y/of retraso significante”.
Compania di transporte RET no lo tin ningun bus circulando den region di Rotterdam, aunke tramnan y metronan lo sigui opera.
Na Utrecht, e cantidad di rutanan di transporte publico cu lo opera segun orario ta depende di cuanto chauffeur di bus y tram presenta na trabou.
Voceronan di HTM na Den Haag y GVB na Amsterdam a declara cu no tin welga entre nan empleadonan, pasobra e companianan aki no ta ofrece servicio di transporte regional.
Compania ferroviario NS a informa cu e welganan no lo tin impacto riba su treinnan, cu lo sigui circula segun orario.
E busnan di NS, cu ta ser uza den cierto areanan pa reemplasa servicio di trein, tambe lo sigui opera segun orario.
