Den e ultimo dianan medionan di comunicacion local a trece informacion dilanti tocante algun incidente unda miembronan di Cuerpo Policial Aruba tabata involucra. Tipo di incidentenan asina por pone den duda e conducta profesional di algun agente, y ta trece dilanti e debate riba bienestar, uso di alcohol y confiansa publico den un institucion clave pa seguridad di Aruba.
Un caso serio cu un medio di comunicacion a trece dilanti a sucede riba aña nobo marduga caminda un subinspector di polis a bira centro di atencion despues cu el a menasa hende cu su arma di candela. Ainda no ta completamente cla ken el a menasa ni na unda e incidente a tuma luga, pero segun e medio di comunicacion un patruya di polis a detene subinspector L.M., kende ta un di e hefenan den division Central di Polis y tin mas cu 40 aña di experiencia den e cuerpo policial.
Subinspector L.M., ya den e ultimo añanan di su carera, a haya su mes involucra den un caso serio. Segun informacion cu e medio di comunicacion a publica, e investigacion penal ta na caminda, mientras cu simultaneamente un investigacion disciplinario a ser activa. Como parti di medidanan inicial, e subinspector en cuestion lo a keda prohibi di drenta cualkier facilidad di Cuerpo Policial Aruba mientras cu e caso ta ser investiga.
Bon Dia Aruba a tuma contacto cu vocero di Cuerpo Policial di Aruba Liliana Rasmijn y a manda pregunta pa confirma si informacion ta corecto, y kico ta e situacion. Rasmijn a informa Bon Dia Aruba cu en berdad un colega di KPA a haya toegangontzegging (denegacion di acceso) y cu e caso ta bao investigacion. Mas informacion Rasmijn no por a duna na e momentonan aki.
Adicionalmente e medio di comunicacion a indica cu tin otro dos agente policial cu den dianan recien lo a haya nan mes involucra den incidentenan. Un agente masculino supuestamente lo tabata involucra den un accidente di trafico y lo tabata bou influencia di alcohol, y un agente femenino supuestamente lo a bira agresivo cu famia y aparentemente lo mester desarma e agente aki.
Tocante e dos agentenan aki Rasmijn a informa Bon Dia Aruba cu e no ta na altura di incidentenan aki y cu no tin polis deteni.
Tipo di incidente asina ta lanta pregunta serio riba disciplina, bienestar y supervision den cuerpo policial. Comunidad ta spera cu autoridadnan lo tuma medida firme pa preveni cu situacionnan asina ripiti, y pa restaura confiansa den un institucion cu tin como mision principal proteha y sirbi e pueblo di Aruba.
