E modulo lander (di aterisahe) di e mision lunar di India a wordo localisa riba superficie lunar ayera, un dia despues cu a perde contact cu e stacion espacial. Esfuersonan ta na caminda pa purba establece contacto cune, segun presidente di agencia espacial nacional.

Agencia noticiero Press Trust of India a cita presidente di Organisacion Espacial y di Investigacion Indio, K. Sivan, bisando cu camara for di e orbiter di e mision lunar a localisa e lander. Oficialnan di e organisacion no tabata disponibel pa duna comentario.

E agencia espacial a bisa cu a perde contacto cu e lander lunar Vikram diasabra, mientras e tabata haci su acercamento final na e polo sur di luna, pa lansa un rover pa busca awa.

Un aterisahe exitoso lo a converti India den apenas e di cuater pais pa aterisa un vehiculo riba e superficie lunar, y apenas e di tres pa opera un rover robotico eynan.

E agencia espacial a bisa diasabra cu e descenso di e lander tabata normal te cu 2km for di superficie lunar. E mision di $140 miyon, conoci como Chandrayaan-2, tabatin intencion di investiga craternan lunar permanentemente den sombra, cual ta pensa ta contene deposito di awa cual a ser confirma pa e mision Chandrayaan-1 na 2008.

E mision mas recien a despega dia 22 di juli ultimo for di e centro espacial Satish Dhawan na Sriharikota, un isla cerca di e costa di estado sur di India, Andhra Pradesh.

Despues di su lansamento, Chandrayaan-2 a pasa varios siman na caminda pa luna, drentando orbita lunar dia 20 di augustus.

E lander Vikram a separa for di e orbiter dia 2 di september y a cuminsa un serie di maniobra di break pa baha su orbita y prepara su mes pa aterisahe.

Unicamente tres nacion – Merca, e antiguo Union Sovietico y China – a aterisa un astronave riba luna.

 

LEAVE A REPLY

Please enter your comment!
Please enter your name here