Banco Central di Aruba (BCA) a conclui e Encuesta di Confiansa di Consumidor pa e segundo trimester di 2025. E encuesta di confiansa di consumidor ta evalua e percepcion economico di e consumidor local.
Preocupacion principal di consumidor den e segundo trimester di 2025 pa e siguiente 6 luna:
Deterioracion di e situacion di negoshinan y di economia a baha na 46% (2025-I: 67%);
Un 40% encuestado ta premira mas dificil pa haya un trabou nobo (2025-I: 36%);
Casi 39% di encuestado ta premira cu e posicion financiero di gobierno lo empeora (2025-I: 49%).
Cerca di 17% di encuestado ta premira cu e situacion financiero di nan hogar lo deteriora (2025-I: 44%).
Consumidornan a keda pesimista, mirando cu e Indice di Confiansa di Consumidor a keda igual na 95,0 den e segundo trimester di 2025 (mira Grafico 1).
E Indice di Habito di Consumidor y e indice di Situacion Actual ambos a baha cu, respectivamente, 0,8 punto di indice ten a 96,8 y 0,5 punto di indice te na 94,3 den e segundo trimester di 2025. Mientrastanto, e Indice di Expectativa a crece cu 1,7 punto di indice te na 94,7. Pa locual ta e Indice di Expectativa di Prijs esaki a baha cu 0,4 punto di indice te na 90,2 den e segundo trimester di 2025 (mira Grafico 2).
Prijsnan mas halto den e proximo 6 lunanan ainda ta keda un preocupacion grandi pa e encuestadonan, como cu 91% di consumidornan ta premira cu den e siguiente 6 lunanan prijsnan lo ta mas halto, cual ta 3 punto di porcentahe menos compara cu e promer trimester di 2025. Encuestadonan cu a indica cu nan por “cumpra menos cu nan entrada compara cu 6 luna pasa” a subi cu 5 punto di indice te na 88% den e segundo trimester di 2025. Pa locual ta e encuestadonan cu a expresa cu nan ta spaar menos, esaki a baha cu un punto di porcentahe te na 35% den e segundo trimester di 2025.
E relato completo di e Encuesta di Confiansa di Consumidor ta disponibel ariba website di BCA www.cbaruba.org
Tocante Banco Central di Aruba
E proposito principal di BCA ta pa contribui na stabilidad financiero y prosperidad economico di comunidad di Aruba. BCA ta logra e mision aki door di implementa un maneho monetario efectivo dirigi na mantene stabilidad di balor di e florin, promove e solides y integridad di e sistema financiero y yuda mantene un sistema di pago eficiente y confiabel.
Banda di su tareanan principal, BCA ta encarga cu emision di biyete di florin y moneda di florin y ta e bankero di gobierno. Ademas e ta regula e transaccionnan di pago cu exterior y ta administra e divisanan di Aruba y ta controla e uso di esaki.
