E analisis di Banco Central encuanto efecto di inflacion riba clase medio den ultimo decada ta mustra riba e situacion empeorante di e categoria di ciudadano aki. Cu esey e berdad di e gruponan di menor ingreso no a desaparece, solamente cu den e contexto aki a enfoca riba otro grupo. Nos por conclui anto cu un titulo mas adecua lo ta cu “Clase medio tambe a sufri di inflacion”. Pero si concentra riba kico a hiba clase medio na sufri un atraso considerable den e periodo di estudio, ta notable cu no solamente inflacion a afecta posicion financiero di e capa social aki; tin otro factor local cu a hunga un papel importante.

Pa esey nos ta bolbe na e inicio di decada di 2010. Den e negociacion di Dialogo Social encuanto posible solucion a mas largo plazo pa e fondonan di pension y gasto medico a bin na claridad cu crea mas espacio pa e ciudadano di menos recurso lo a trece consecuencia financiero pa e ciudadano di mas ingreso, e asina yama ‘schoudernan mas hancho’ cu efectivamente a haya e peso ey pa carga. E aumento di e limite di entrada pa e primanan tabata drastico, y a bay te na Afl. 85.000 pa aña, cu anteriormente tabata Afl. 56.000. Ademas a introduci un aumento di e prima di AOV mes tambe. E tempo ey e pensamento tabata cu no tabatin otro alternativa y no a surgi otro tampoco. Emedidanan tuma e tempo ey a percura pa dos solucion importante: e viabilidad – por lo pronto – di e fondo di AZV, y di viabilidad pa 10 aña di e fondo di pension AOV, a traves di aumento gradual di edad di pension te na 65 aña. Importante pa recorda cu e 10 añanan di vigencia di e medida di pension a termina y por ripara, a base di e cifranan di SVB, cu actualmente nos tin un aumento di e cantidad di persona cu AOV di alrededor di 1.000 pa aña. Tin un aspecto importante pa añadi aki: e hecho cu e primanan ta cay pa un bon parti pa e dunadornan di trabao no ta salba nos di e efectonan, ya cu e gasto di prima ta lanta cabez den e ‘costs of doing business’ cu cada empresa lo mester inclui den nan prijs y por lo tanto ta contribui na e inflacion genera localmente. E efecto ey ta aparece den e prijs di producto y servicio y ta afecta tur consumidor, di tur nivel di entrada. Esaki ta banda di e aumento di prijs bao influencia di inflacion importa, a base di fluctuacion di prijs riba, principalmente, mercado Mericano.

Transporte

E estudio di Banco Central a toca un asunto importante den inflacion cu specificamente a afecta clase medio: transporte. Esaki sin duda ta e caso y ta conta pa tur elemento di e categoria aki. Prijs di e vehiculo mes, cu por cierto a aumenta globalmente bastante den ultimo añanan, pero cu esey tambe prijs di seguro, a base di prijs di compra mas halto y tambe anto costo di reparacion den caso necesario. Prijs mas halto di pieza naturalmente ta afecta tur doño di auto, no mester lubida esey. Ademas, prijs di fia placa tambe a tuma su curso y financia un auto nobo tin e consecuencia di e obligacion di un seguro all-risk pa e promer añanan. Contal cu financia un auto ta afecta un budget familiar di sobremanera. Sin embargo, e realidad ta cu obtene un vehiculo semper ta brinda e posibilidad di cumpra un auto mas modera, loke ta baha prijs, prima di seguro y gasto di reparacion. Si nos no ta equiboca por a nota un cambio tambe den direccion di compra di auto mas barata. Claro cu esey no ta conta pa esnan cu si tin e forma pa financia un auto di berdadero luho, pero con grandi e mercado ey ta?

Otro categoria cu a afecta clase medio ta prijs di vivienda, tanto pa compra o pa construccion propio. Aki tin varios elemento atrobe, manera prijs di material di construccion, pero tambe prijs di tereno, sea di propiedad o di (re)benta di erfpacht. Riba tur esaki a bin e competencia di doño den exterior cu ta explota nan propiedad como Airbnb, loke tambe ta afecta mercado directamente. Tambe ta di supone cu e prijs aumenta di propiedad inmobiliario ta refleha den e aumento di prestamo hipotecario. Por mira cu e suma total di hipoteca den ultimo 10 aña a keda aumenta gradualmente y parti di esaki lo ta consecuencia di prijs di construccion y prijs di tereno. Na e momento aki nos no tin dato cu por mustra un separacion di e elementonan contribuyente na aumento di prijs di vivienda.

No por falta e observacion cu prijs di construccion no a afecta solamente e ciudadano cu tabata den condicion di cumpra o construi un cas; el a afecta tambe e ciudadano cu no por yega na un cas y ta depende di huur. Por nota un ascenso imparable den prijs di apartamento tambe, es decir cu den e categoria di vivienda, cumpra o traha o huur, tur a haya golpi.Pa bolbe na e tema di transporte, ta importante enfatiza cu transporte individual ta expresion di un escogencia politico, unda pa decadas gobierno(nan) ta scoge pa ignora e necesidad di transporte publico pagable. Si awor nos no mester mas di luz di trafico, pasobra e rotondenan di mes ta para trafico, anto nos mester sigui den direccion di 140.000 habitante, cu 120.000 vehiculo individual aki 10 aña?