E siman aki riba rednan social, influencer Augusto Corrente a comparti un video, unda ta mustra un parti di su “ABC Project.” Den e video, e influencer ta yega Aruba for di Venezuela cu su kite.
Den su post, Corrente ta bisa cu el a sali di Adicora y a kitesurf yega Aruba, un biahe di mas di 55 kilometer cu a dura dos ora y mey.
Corrente a conta cu su “travesia a cuminsa den estado Falcon, na Adicora, e paraiso di biento. Mi a warda pa e dia cu e condicionnan perfecto, y sin kere den niun hende, mi a bula den e biahe aki di mas di 55 kilometer den lama habri. Mi so cu mi so.”
El a conta cu despues di dos ora y mey, el a yega Baby Beach. El a para su kite, y a nota cu un hoben muhe tabata haci señal p’e. El a acerca e muhe, y nan a cuminsa un combersacion amistoso.
“Tur cos tabata bayendo di maraviya,” el a bisa, pero diripiente, autoridadnan a presenta. E muhe a opta pa bandona e sitio inmediatamente mientras autoridadnan a cuminsa interoga Corrente.
Autoridadnan a cuminsa listra pertenencianan di Corrente, y a haci pregunta relevante, manera di unda el a bin, si e tabatin droga cune, of tabatin cosnan ilegal den su tas, y pakico el a dura asina largo pa yega. “Nos tabata wardando bo,” autoridadnan a bisa.
“Mi a pidi nan laga mi bay back please,” Corrente a bisa. Sinembargo, el a keda deteni. “Nan a hiba mi un hotel di un strea,” el a conta, mustrando un potret di su cel. “Cu tur cuminda paga, cu derecho na 20 minuut di patio.” El a keda deteni pa dos siman, segun su relato.
Eventualmente, el a keda deporta via avion, y un di e prome cosnan cu el a haci ta bay haci un tattoo di bandera di Aruba. “Y asina a termina e prome fase di e ABC Project,” el a conclui.
Den un video posterior, el a comparti di su biahe for di Chichiriviche pa Corsou, un biahe cu a dura 8 ora y mey riba lama habri.
