(Infobae) – Figuranan manera Elon Musk, CEO di Tesla, y Bill Gates, fundador di Microsoft, a señala cu desaroyo di software ta pasando door di un transformacion impulsa pa agentenan di inteligencia artificial.
Ingeniero di Microsoft David Fowler a declara cu skirbi code manualmente “a bira completamente obsoleto”, un definicion cu ta resumi e cambio cu inteligencia artificial (AI) ta introduciendo den programacion.
Posicion di Fowler no ta nifica cu programadornan lo disparce inmediatamente. Loke e ta propone ta mas bien un cambio den funcion: menos tempo skirbiendo code manualmente y mas tempo verificando, coregiendo y validando e trabao cu sistemanan automatisa ta haci.
Kico ta bira e rol nobo di programador?
E impacto di AI ta reorganisando trabao tradicional di desaroyo di software. Profesionalnan cada bes mas ta pasa pa formula instruccionnan pa agente di AI y despues ta revisa e resultado, ahusta contestanan y examina e code genera.
Microsoft mes ta adaptando su plataforma na e modelo aki. Aspire a agrega sosten pa MCP y un interface di liña di comando prepara pa traha cu agentenan den version 13.2.
Sinembargo, e transformacion no ta elimina e necesidad pa control humano.
Investigadornan di Microsoft mes a observa cu precision di modelonan ta baha mientras tareanan ta bira mas largo y complica, algo cu ta fortalece e idea cu automatisacion ainda no por funciona completamente sin revision posterior.
P’esey, contesta actual riba e pregunta si AI lo reemplasa programadornan ta mas limita: e hermentnan por asumi un parti cada bes mas grandi di e proceso, pero hende ainda ta necesario pa valida resultadonan, haya erornan y dicidi si por usa e software den un manera sigur.
