Awe mainta, Sr. Guilfred Besaril ta bay ta den corte, enfrentando cargonan relaciona cu su tempo como minister Plenipotenciario na Hulanda. Na mes momento, corte ta bay trata e caso di expropiacion contra e ex-minister.

Lectornan di Bon Dia Aruba por recorda con na juli di 2022, Gabinete Wever-Croes II a anuncia e retiro di Sr. Besaril, bisando e tempo aya cu “Sr. Besaril a tuma e decision aki basa riba un evaluacion personal y familiar.” E tempo ey a anuncia tambe cu Sr. Ady Thijsen lo tuma over e posicion, combina cu e funcion di representante den Union Europeo.

Sinembargo, ya pa october di e aña ey, den un conferencia di prensa, prome minister e tempo aya, Evelyn Wever-Croes a papia di un investigacion na Arubahuis. Wever-Croes a admiti cu algun cos no a bay manera mester a bay na Arubahuis, p’esey el a pidi Centrale Accountantsdienst (CAD) pa haci un investigacion. Wever-Croes a considera importante splica cu oposicion ta bin treciendo den noticia un e-mail di aña 2021 unda ta menciona cosnan cu no ta bayendo bon den Arubahuis.

“Na prome luga mi tin cu bisa cu mi ta conoce e e-mail aki, mi a ricibi e e-mail aki y e denuncianan di e-mail aki ta exactamente loke mi a pidi pa e investigacion. Kiermen e ta parti di e investigacion cu mi mes a pidi den cuadro di Arubahuis. Mi por bisa cu hasta esun cu a manda e e-mail aki a resulta di ta parti di e investigacion tambe, ta parti di dje”, el a menciona.

Igualmente, a declara cu locual cu ta pasando ta cu e investigacion ainda ta den proceso y cu cosnan asina “por tarda”.

Den e conferencia di prensa aki, redactor di Bon Dia Aruba a puntra prome minister si nan ta bay entrega un keho contra Guillfred Besaril. Pa cu esaki, prome minister a declara cu Sr. Besaril a tuma su retiro como minister Plenipotenciario y cu ora un persona ta tuma retiro como minister of parlamentario, nan tin un aña di overbruggingstoelage. Esey ta nifica cu e ta den periodo ey. Wever-Croes a clarifica cu e investigacion no ta bay riba Sr. Besaril.

Ademas, el a comenta cu te ainda nan no sa si ta bay entrega un keho contra Sr. Besaril pa motibo cu esey specificamente e investigacion ta bay duna.

Esaki tabata banda di un caso civil contra Besaril, den cual ya caba hues a dicta cu e no tabata apto pa traha como polis.

Den e caso civil, a acusa Sr. Besaril Emiti ordennan di pago cu beneficio personal, di a realisa gastonan a costo di Pais Aruba, y di no a haci un control di facturanan. Den e caso ey, Hues ta bay di acuerdo pa retira Besaril for di su funcion di polis aunke e la comete abuso di su funcion den calidad di minister plenipotenciario, pero ta di opinion cu tambe por pone e funcion aki di den su calidad di polis. Tambe hues ta bisa cu Besaril su accionnan cu e la haci, no ta hacie apto pa traha como polis mas ni como un funcionario publico.

Un aña despues, sinembargo, na october di 2023, Ministerio Publico a confirma cu tabatin un keho penal contra Sr. Besaril.

Detencion
 Na februari di 2024, Besaril a keda deteni relaciona cu e caso denomina Tulipan. El a keda den libertad 24 dia despues, na momento cu OM no a bolbe solicita pa prolonga su detencion.

Investigacion Tulipan ta dirigi riba iregularidadnan na Arubahuis den e periodo di 2018 te 2021, tempo cu Besaril tabata den funcion di minister plenipotenciario di Aruba na Hulanda.

Caso Tulipan
 Segun loke ta conoci di e investigacion, mientras cu e sospechoso tabata den su funcion como minister Plenipotenciario na Hulanda, den poco palabra “el a haci fiesta cu credit card” y a hasta el a huur un propiedad na Hulanda unda a drecha hardin y cura di e cas, a pone un sistema di alarma pa 10.900 euro y a haci reparacionnan den e mesun cas na un costo di 21.000 euro na aña 2020.

Esaki segun rapport di Centraal Accountantsdienst di Aruba (CAD) cu a presenta na Parlamento di Aruba den un reunion publico dia 13 di december 2022. Sr. Roland Pang di CAD a informa e parlamentarionan y pueblo di Aruba con e investigacion a bay. El a crea controversia na momento cu el a splica cu nan a investiga 18 luna so, pa motibo di app di e banco ABN Ambro, algo cu a ricibi critica di un parlamentario riba e hecho cu nan no tabata warda informacion di e cuenta di banco of pakico no a pidi esey for di archivo.

Den esaki, tambe a bira conoci cu el a haci un biahe pa bin Aruba cu no a wordo aproba pa Conseho di Minister na december di 2020, unda el a paga na hotel Divi Village 1.300 euro. Tambe su yiu cu a caba di nace a ser beneficia cu placa di pueblo di Aruba, ora el a drecha henter e camber di e integrante nobo di e famia. Su casa tambe a biaha riba VIP business class na momento cu Aruba tabata pasando un mal momento debi na pandemia di Covid-19. Esaki ta algun ehemplo chikito di hopi gasto cu e ex-minister a haci.

Desigualdad

Finalmente, maart ultimo, den Corte di Prome Instancia di Aruba a tuma luga e audiencia preliminar (regiezitting) di e caso penal Tulipan.

Segun e noticiero local Noticia Cla a reporta, durante e audiencia preliminar Besaril a expresa cu e base di su caso mester ta basa riba igualdad di trato y e maneho presupuestario hiba durante su periodo como minister plenipotenciario na Hulanda.

Besaril, ken tabata desempeña e trabao di agente policial pa hopi tempo, a splica den corte cu e ta un homber di ley y cu semper el a actua di forma corecto conforme ley. Awor cu e ta sospechoso den un caso penal, segun e portal a indica, el a sigura cu no ta algo facil pa asimila.

E ex-minister plenipotenciario a indica cu aunke e no ta acusa Ministerio Publico como tal, e caso no ta cana manera debe ser y cu desde principio e caso no a cuminsa di bon manera.

El a splica, como ehempel cu e persona cu tabata representa Aruba na Bruselas, ken tabatin un oficina den Arubahuis pa practicalidad, y ta esun cu a bati alarma tocante supuesto iregularidadnan, no tabata e persona indica pa haci esaki.

El a sigura un biaha cu e no ta culpa Ministerio Publico pasobra ora cu e caso a yega cerca nan, ya e no tabata corecto y tabata influencia. El a indica cu su caso t a basa riba e aspecto tecnico di presupuesto, pero ta su so ta para den corte, siendo cu esnan cu a tuma decisionnan y a aproba e presupuesto, y esnan complementario no ta para banda di dje – referiendo na esnan encarga cu e maneho di presupuesto y presonan clave cu tabata involucra den e proceso door di cual e ta e sospechoso principal den dje.

Pa e motibo ey Besaril a solicita testigonan cu por clarifica detayenan cu ta importante den e caso.

Pa loke ta e desigualdad cu segun Besaril, tin den e tratamento di su caso, NoticiaCla a indica cu e sospechoso a trece dilanti cu na cierto momento, e minister di Rechtsbescherming di Hulanda a hay’e den un situacion igual na su esun cu e ta den dje aworaki, pero cu e minister Hulandes a ser trata diferente.

El a indica cu na Hulanda e minister a sinta henter su periodo sin ningun problema y a yega na un acuerdo di pago via belasting. E mesun situacion a sucede cu e alcalde di Amsterdam, Femke Halsema, ken tambe a logra yega na un acuerdo di pago cu belasting y te cu dia di awe ta fungi como alcalde.

Besaril a remarca cu den ambos caso ta trata di personanan cu a abusa of no a maneha e propiedad y placa di na pais di un manera corecto, pero toch a haya trato diferente compara na su persona.

Na Hulanda e personanan aki a sinta, of ta sinta ainda, ainda sin problema, a yega na acuerdo pa paga bek y a haya e oportunidad pa coregi nan eror. Contrario na esaki su persona a ser cera den KIA durante 24 dia, na momento cu e caso a cuminsa.

Pa e motibo aki el a expresa cu nan ta tratando e diferente, siendo cu ta trata di e mesun Reino Hulandes y mester traha conforme e asina yama gelijksheidsbeginsel.

Besaril a sigura cu e lo tin oportunidad di demostra su posicion ora trata e caso integralmente den corte, cu lo ta awe mainta.