Nos por nota hopi señal preocupante pa locual ta salubridad social/publico na Aruba, for di casonan tragico pa erornan medico, pa preocupacion riba nivel di full e sistema social door di embehecemento. E ta sumamente obvio, cu e ruta bieu no por sigui, si nos kier salvaguardia nos sistema di salubridad publico. Den tur esaki innovacion, den mi opinion lo hunga un rol grandi pa baha gastonan riba nivel total, pa hisa calidad di servicio y en berdad haci pueblo mas saludabel.
Den e siguiente alineanan nos lo toca 3 ehempel recien como inspiracion pa cu innovacion den salubridad na Aruba. Pero nos tin cu bisa, cu ta eigenlijk full e sistema di salubridad na nos isla mester un ‘revamp’ por completo for di nivel fundamental. Pero como inspiracion en general e innovacionnan den AI, Robotica, 3D Printing por ta ilustrativo.
Inteligencia Artificial pa Diagnostica Sepsis
Sepsis, cu ta e forma mas severo di infeccion ta causa 1 den 3 morto na hospitalnan na Merca, pero pa sa cua pashent tin e riesgo mas halto pa e complicacion aki ta dificil. Awo dokternan na Northeastern University na Merca a traha un herment cu por predici Sepsis cu 99% precision. Door cu esaki ta un herment digital e por wordo implementa rapidamente y pa gastonan minimal relativo na cuanto bida e por salba. Mas detayenan di e estudio por wordo nota na e siguiente link: Sergey Aityan et al, AI-Powered Early Detection of Sepsis in Emergency Medicine, Life (2025). DOI: 10.3390/life15101576
Cirugia Robotico pa Transplantacion di Curason
Un transplanta di curason ta ingreep hopi grandi y e pashent hasta si e sobrevivi e operacion e por spera un tempo sumamente largo di recuperacion, tambe e gastonan cu simannan largo cu un pashent mester keda den hospital ta un presion inmenso pa e budget publico di e sistema di salud publico. Bou guia di Dr. Kenneth Liao na Baylor St. Luke’s Medical Center na Merca a perform un ingreep cu cirugia robotico, unda cu incision chikito por a transplanta e curason di e pashent. Esaki na lugar di habri full e pecho di e pashent, manera ta custumber pa e ingreep sumamente peligroso aki. Esaki ta un ehempel masha duidelijk unda innovacion por yuda rescata bida humano y na mesun momento reduci gastonan pa full e sistema di salud. Mas informacion na e siguiente link: https://www.bcm.edu/news/robotic-heart-transplant-surgery-performed-at-baylor-st-lukes-medical-center
Uso di 3D Printing pa Transplanta na Corea di Sur
Awo e siguiente ehempel lo echt parce Sci-Fi pa hopi lector. Nos sa cu pa pashentnan cu tin necesidad pa un transplanta semper tin un tekort na organo, un lista di espera largo cual hopi biaha ta causa complicacion of te hasta morto di e pashent, y riesgo cu e organo lo wordo rechasa pa e pashent cu haya e organo en cuestion. Awo na Corea di Sur a usa un 3D Printer y materia celular di e pashent mes, pa construi full un trachae (windpipe na Ingles) funcional pa un pashent. Tambe a opera e pashent y a implanta e trachae aki, despues di 6 luna a nota cu esaki ta den estado sumamente bon y cu e pashent no tabatin di mester a usa medicina immunosuppressivo pa e ingreep aki. E proceso revolucionario aki bou liderazgo di Professor Kim Seong-won a tuma lugar na Seoul St. Mary’s Hospital of the Catholic University of Korea. Mas informacion por wordo nota na e siguiente link: https://www.3dnatives.com/en/worlds-first-3d-printed-trachea-transplanted-in-south-korea-200320246/
Cu e 3 ehempelnan ilustrativo aki, mi persona kier mustra cu en berdad tin alternativanan realistico pa cu sistemanan di salubridad, tambe pa nos isla. Pero implementa esakinan ta rekeri disposicion politico, di kader medico, y realisacion cu innovacion ta e unico manera cu nos por salvaguardia nos sistema di salubridad publico den futuro cercano y a largo plaso.
