Organizacionnan priva y publico trahando pa cumpli exigencianan di tratadonan di Derechonan Humano ta experienciando e reto cu no tin fondo pa cumpli cu nan trabou. Miembronan di Cuerpo Policial cu mester duna servicio y brinda proteccion na publico a pesar di ta ricibi menasa.
Tur ta turbulencia riba instancianan publico y NGO’s cu ta traha den e area aki y cu tin efecto pa henter comunidad.
Investigado Emma Pullen kende ta haciendo su promocion na Universidad di Utrecht y Universidad di Aruba ta ehecutando un investigacion amplio riba e tema con “profesionalnan publico manera dokter, polis, docente y trahadonan social ta anda cu discordia of inquietudnan social, y turbulencia continuo.” Segun e investigado, e realidad di hopi profesional rond mundo y sigur na Aruba ta cu tin hopi inseguridad, ta dificil pa predeci kico ta bay pasa mañan. E inseguridad aki tin impacto riba funcionamento di e profesional y e pregunta ta con nan absorba esaki.
E investigacion ta enfoca riba estadonan chikito di isla (SIDS) y na Aruba, Pullen a enfoca su investigacion riba ayudo humanitario y trahadonan den e ambito social cu ta luchando cu e problema cu hopi di nan fondo cu mester pa nan trabou a desaparece. Tambe Pullen a investiga con agentenan policial ta anda cu turbulencia despues di e incidente unda a tira un hoben chauffeur mata, Manera ta conoci e incidente cu ta den man di Ministerio Publico a lanta hopi rabia y desconfianza den comunidad, unda polisnan mester a confronta menasanan (particularmente online).
Pullen por a saca afo cu berdad tin hopi turbulencia y tabata kier sa con e organisacionnan mes tabata anda cu esakinan, ki tipo di sosten ta(bata) brinda na esnan cu ta traha den e sectornan aki. “Locual a yama mi atencion ta e contacto personal, colaboracion interno, pero tambe acercamentonan informal ta hopi importante.”
E puntonan aki a sali mas fuerte dilanti durante un sesion na Universidad di Aruba, durante cual un grupo di personanan envolvi den e trabou a reuni pa ehercicionan, pa mira con por anda miho cu tur e retonan nobo cu nan ta confronta. Esnan cu a participa un biaha mas a enfatisa e necesidad di ta informa kico otro ta haci pa asina hisa eficiencia, elimina frustracionnan innecesario y mehora servicio a pesar di e hecho cu fondonan a cay afo. Ta pa medio di colaboracion entre instancianan por scapa placa, tempo, sin cu mester sacrifica (hopi) e servicio cu mester brinda, y sin cu e tin impacto grandi riba e persona cu ta haci e trabou. “Hendenan cu sa con pa haya otro, sa kico nan tin na otro ta yuda den momentonan di turbulencia,” Pullen a splica. “Colaboracion, intercambio di informacion y transparencia entre organisacionnan berdad ta esencial, pero tin biaha ta yuda hopi ora ta puntra otro ‘Con ta bay, kico mi por haci pa bo.’”
Den otro palabra los di e aspectonan grandi, manera busca financiamento pa sigui cu trabou for di otro fuentenan, ta procesonan informal cu ta yuda e trahadonan den e sectornan di servicio continua cu nan responsabilidad, den tempo di turbulencia.
Como ehempel Pullen ta bisa cu e ta importante pa polisnan, prome cu nan sali riba caya, bin un rato hunto, combersa cu otro den un ambiente informal pa asina nan por ehecuta nan trabou miho posibel. Intercambionan informal mester bira algo structural. Mescos ta conta pa esnan cu ta brinda ayudo humanitario, cu nan por combersa cu otro riba kico nan ta experiencia. “Alabes mi ta kere si cu ta hopi habri cu otro, riba un isla unda tur hende conoce y ta topa cu otro, ta un reto adicional.” Pa tal motibo si cu e investigado a organisa sesionnan pa encuentronan entre esnan cu ta traha den e areanan di sosten y asistencia.
Di otro banda, e investigacion di Pullen no ta solamente riba kico ta sosodiendo cu personanan den e sector di servicio humanitario y asistencia na comunidad na momento cu tin inseguridad y turbulencia, pero tambe kico ta un solucion structural pa nan retonan. Ta solucionnan cu ta bin dilanti den e sesionnan di encuentro, cu, segun Pullen e lo amplia riba dje den e documento final. “Esnan cu ta traha diariamente cu comunidad, sa kico mester sosode.”
(Red: Departamento di Estado di Merca a percura fondonan pa entre otro Aruba atende cu refugiadonan riba e isla mes, pa asina entre otro evita cu refugiadonan bay Merca. Mescos ta e caso cu e servicio di Immigracion y Duane Mericano na Aruba, cu a keda institui pa entre otro percura cu personanan cu tabata hiba droga pa Merca, por keda deteni na Aruba, en bes cu ta bay Merca.
Sinembargo, e politica nobo di Presidente Trump a nifica cu a para cu financiamento di hopi trabou pa sosten na refugiadonan y Hulanda no tin intencion pa absorba e gastonan aki tampoco.
E ta nifica cu sea Aruba tin e reto su dilanti pa mira con pa sigui brinda servicio na refugiadonan cu ta alrededor di 10 mil hende. Y si no brinda un sosten, realidad ta cu e isla y su comunidad lo paga e consecuencia, pa motibo cu ta bay tin miles di hende desespera pa sobrevivi.
