Aruba Tourism Authority (ATA) lo evalua e impacto di e problema cu InselAir. Esaki su directora Ronella Tjin Asjoe-Croes ta bisa. Sinembargo e ta bisa tambe cu awor cu gobierno di Corsou lo inyecta 33 miyon florin den e compania di avion e ‘panorama’ a cambia y ta haci uno mas positivo.

Segun e halto ehecutivo di turismo, pa loke ta relaciona cu InselAir su impacto local, den su totalidad locual ta trata turismo mester remarca e mercado di Europa, ya cu e otronan no tin mucho impacto. Pa loke ta trata turismo inter insular, considerando e importancia di InselAir pa conecta e islanan,  sra. Tjin Asjoe-Croes a bisa cu eynan mester reconoce cu e impacto lo ta mas grandi. E directora a bisa cu nan lo mira e cantidad di turista cu ta haci uzo di e vuelonan di InselAir. E ta reconoce cu entre nan mester considera e mercado di Europa considerando e hendenan cu ta bula pa medio di KLM haciendo uzo di Corsou  pa conecta cu nos isla. For di 2011 ta existi un aliansa entre InselAir Internacional, Insel Air y e KLM,  caminda pa medio di un acuerdo di inter linea aereo nan a amplia nan servicio pa nan pasaheronan.  Kiermen e pasaheronan cu tin un ticket di KLM por bula na tur destino di Insel Air entre nan Aruba, cu ta catalisa gran parti di e turista Europeo cu ta haci uzo di e compania aereo  Hulandes. E pasaheronan ta wordo transporta automaticamente pa medio di e hubnan di Insel Air na Corsou y Sint Maarten.

Considerando e echo cu Aruba su capacidad aereo di KLM a aumenta for di mediado di 2016 pa medio di un vuelo adicional. E operacion di Insel Air ta yuda pa canalisa e bishitantenan for di e mercado di Europa, pero esaki ta un situacion cu nan ta monitor for di aña pasa.

Otro mercado
Otro mercado di nos turismo no ta haciendo uzo grandi di e vuelonan di InselAir. Pero igualmente mester tene cuenta  cu e diferente esfuerso  cu e compania menciona a wordo haci pa introduci rutanan nobo, algun di nan a keda vigente, pero otronan a wordo cancela. Pues den e general e directora di ATA ta haya cu e impacto no lo ta hopi di e banda ey; pero si riba transporte di pasahero inter insular. Na 2006, InselAir a inicia su operacion cu un avion Embraer 100-P1 Bandeirante y su vuelo inaugural tabata Aruba. E compania aki a cuminsa crece keto bay cu vuelonan  diario pa nos isla, y otro isla bisiña manera Bonaire y tambe el a cuminsa bula pa Las Piedras  na  Venezuela.

Na 2016 InselAir a bira un di e companianan mas grandi den nos region; pero  su situacion financiero a cuminsa haci un impacto grandi riba dje poniendo e compania te e porta di casi bati bancarota. Un motibo ta cu placa di e compania di avion a keda pega na Venezuela. Sinembargo e compania tambe tin problema cu personal, esta falta di piloto, pero tambe su retonan cu mantencion di e avionnan. E dianan aki 80% di e flota tabata afecta. Asina hopi pasahero a keda pega na e islanan Caribense, entre otro tambe na Aruba. Ayera nochi atrobe pasaheronan a keda pega pa motibo di problema tecnico cu avion.