Inspeccion di Husticia y Siguridad ta investigando con reclassering y polis a atende cu kehonan di molester relaciona cu e asesinato di studiante Humeyra.

E studiante a keda asesina riba tereno di e scol Designcollege na Rotterdam pa su ex. E sospechoso a keda sentencia den pasado pa maltrato y menasa di su partner. Humeyra a haci denuncia di molester un siman prome cu su morto. Inspeccion den e caso aki mester investiga si e instancianan a actua corecto y si por a evita e incidente fatal. E sospechoso Bekir ta encarcela pa e asesinato. E tabatin prohibicion pa tene contacto cu e studiante. Ta riba e prohibicion aki e studiante tabatin un cita cu polis mesun merdia di e incidente fatal, segun inspeccion. Apenas 45 minuut prome cu e cita el a keda asesina.

E por a core, pero bala a alcance fatalmente. Djis despues a detene e sospechoso. Inspeccion ta bisa cu ciudadanonan mester por confia cu e organisacionnan responsabel ta actua na tempo. Minister Grapperhaus ta haya corecto cu ta bay haci investigacion. Mas ainda pasobra e homber ta conoci pa maltrato di su exnan. Un rapport di reclassering ta indica cu ora e damanan a termina e relacion cu ne e ta bira agresivo y menasante. Hues a condena e sospechoso den augustus ultimo na 6 siman castigo pa maltrato y menasa di e studiante Humeyra. Den e veredicto tin poni cu mester tene cuenta cu e sospechoso lo por comete un crimen.