Dia 04 di april ultimo, Bon Dia Aruba a publica un articulo di e dentista Hendrik Marsman, unda el a haci un denuncia publico pa cu cuido dental na Aruba. Den esaki, Bon Dia Aruba a tuma contacto cu Inspectie Volksgezondheid Aruba (IVA) pa nan duna nan banda di medaya tocante e caso aki.

Frances Rugebregt, ken ta fungi como beleidsmedewerker/policy advisor di e departamento aki, a indica na redactor di Bon Dia Aruba cu “di banda di Inspectie, semper nos ta informa tur dunado di cuido cu nan por entrega un keho/notificacion por escrito contra un otro dunado di cuido si nan tin preocupacionnan tocante e calidad di cuido cu ta wordo duna. Nos tin un procedura special pa esaki.”

Ademas, el a indica cu “Marsman ta na altura di e procedura aki. Pa kehonan tocante finanzas lo mester acudi na AZV y pa kehonan tocante e registracion di un dunado di cuido pa por traha na Aruba, lo mester ta na DVG.”

Tocante e preguntanan di Marsman relaciona cu un caso penal contra otro dentista di inicialnan A.A.K, cu a tuma luga na luna di juni 2022 y cu a keda deteni pa sospecho di falsificacion y di a realisa actonan den cuido medico contra Ley di Calidad den Cuido Medico, Marsman a señala cu hopi hende ta puntra ken a haci robes den caso aki: “Pueblo mag di haya sa e investigacion di IVA tocante e caso aki di kico a bay robes y si esaki no lo pasa mas? Hopi pashent di e persona aki a keda perhudica.”

Pa esaki, Rugebregt a indica cu di loke ta trata casonan andando na Inspectie, nan no por divulga informacion di esaki.

Pa un dunado di cuido por haci entrega di un keho of un notificacion contra otro dunado di cuido y señala nan preocupacion, tin un procedura special cu ta lo siguiente:

Un rapport di keho of notificacion contra otro dunado di cuido ta wordo ricibi pa Inspectie Volksgezondheid caminda nan ta cuminsa e procedura y por tuma liga na un investigacion of un bishita di inspeccion. IVA ta señala cu nan semper ta considera un keho como un oportunidad pa mehora e atencion y nan intervencion ta pa traha cu tur proveedor di servicio di cuido pa mehora atencion medico.

Den e ‘Het Meldpunt IVA, Klachtenprocedure zorgverlener tegen zorgverlener’ actualisa na october di 2022 ta indica cu Meldpunt ta e departamento den IVA cu ta monitoria e proceso di maneho pa loke ta trata preguntanan cu ta drenta, rapport y kehonan pa cuido medico, nan opina cu un miho comunicacion entre dunadonan di cuido ta conduci na un miho cooperacion y pa e beneficio di calidad na e mesun pashentnan nan ta pidi pa comunica entre otro primeramente pa asina resolve e diferencianan existente, sino por usa e procedura aki.

Primeramente mester presenta e keho contra otro dunado di cuido di manera digital y manda nan via e-mail, ora esaki ta yega na IVA nan ta cuminsa un investigacion pa asina ey por compronde e problema y solucionnan posibel pa mehora atencion di cuido.

Unabes e dunado di cuido ta ser informa tocante e caso presenta contra su persona na IVA, e ta ricibi un carta di anuncio cu un resumen di e keho y posiblemente mas pregunta di IVA, ademas un contesta di e dunado di cuido por escrito y duna na IVA cualkier otro informacion adicional.

Siguientemente, IVA ta invita ambos parti pa un entrevista si ta necesario, e keho tambe por wordo discuti entre ambos parti, pa loke ta trata e maneho di keho, IVA ta spera cu e dunado di cuido cu a wordo denuncia lo investiga minuciosamente e denuncia y duna na IVA kico ta e resultado di investigacion, ki decisionnan a wordo tuma y den ki tempo ta bay implementa e medidanan cu a dicidi.

Ora e keho ta cera, ta informa e denunciante via un e-mail tocante e tramite di e denuncia, dependiendo di e denuncia IVA por tuma diferente decision, por ehemplo, no lo tuma medida of accion y ta cera e rapport; ta haci acuerdonan concreto entre e dos dunado di cuido y IVA cu mester cumpli y ta cera e notificacion; e dunado di cuido acusa ta ricibi medidanan di mehoracion di IVA, nan ta duna siguimento na esaki si e keho cu ta presenta un riesgo importante pa salud di e pashentnan of e dunado di cuido a surpasa su capacidad di autoridad (LBIG) of no a brinda atencion adecua (LKIG) ta bay ricibi un medida administrativo.

Dia 3 di april e dentista Hendrik Marsman a denuncia den medionan local un supuesto caso di un tecnico dental cu ta trahando como specialista, algo cu segun Marsman a bisa no ta permiti pa ley, cu ta indica cu un tecnico dental tin mester di un carta di referencia di un dentista e por haci trabou den boca.

Marsman a sigura cu e persona aki ta publica su trabounan y ta haci publicidad riba rednan social, pa locual Marsman a denunci’e caba y ta bisa cu e persona aki no a bay universidad y cu tampoco ta un specialista.

Tin ley cu ta bisa cu tecnico dental mester un orden di dentista y asina cu tin un djente den boca e no mag di traha den boca di pashent, “esey ta e ley existente y esey ta e ley cu IVA mester aplica. Nan mester tuma medida contra hende cu ta bisa cu nan tin cierto opleiding, pero IVA ta drumi.” El a bisa.