(NLTimes) – Servicio Nacional di Inspeccion di Bienestar di Animal na Hulanda a atende un cantidad di informe di bestianan di cas neglisha aña pasa, cu un aumento drastico particularmente bou di pushi, segun e rapport anual di e instancia obteni pa RTL Nieuws. Inspectornan a informa cu regularmente nan ta topa cu “negligencia, agresion y casnan severamente sushi.”
E inspectornan a actua 16.000 biaha aña pasa. E informenan di veterinarionan a subi drasticamente, yegando 252 na 2024 compara cu 100 e aña anterior. Tur hende por entrega un rapport via e punto di melding nacional 144, y profesionalnan manera veterinario tambe por tuma contacto directamente cu e servicio di inspeccion.
E cantidad di notificacion cu ta trata di pushi neglisha a aumenta explosivamente, mientras cu informenan tocante cacho, parha, cabay y conenchi tambe a keda halto. Pero e severidad di e casonan aki a aumenta constantemente.
Inspectornan Jolanda y Wilfred recientemente a yega na un residencia hopi contamina despues di un informe di bisiñanan preocupa a traves di e number di informe nacional, 144. Den e cas, nan a haya monton di materia fecal di pushi, un holor fuerte di amoniak for di orina, y decena di saco di sushi plama tur caminda. Yen di bleki di cuminda di pushi habri tabata benta riba vloer.
“Loke bo ta hole ta e amoniak for di e orina di e pushi,” Inspector Jolanda a bisa RTL. E pushi cora tabatin mester di cuido veterinario urgentemente. “E no tin ni bigote mas, y su djentenan ta severamente inflama.”
E inspectornan a papia cu e doño, kende a expresa un boluntad pa cuida e pushi, pero a admiti cu e no por a haci esaki actualmente. Jolanda a bisa, “E kier yuda e pushi y cuida su bestia. Solamente e no por handle awor. Pues nos lo yuda. Nos lo salba e bestia.”
Jolanda y Wilfred tipicamente ta maneha entre cuater y dies rapport diariamente. “Regularmente nos ta mira e tipo di casnan neglisha aki. Negligencia di bestia y casnan neglisha hopi biaha ta bay man den man. Y si, hopi biaha e ta hasta pio. Tin biaha e holor di amoniak ta pone bo yora y tosa,” Jolanda a agrega. “Nunca mi no ta caba tur mi trabou den un dia,” Jolanda a bisa RTL. Aña pasa, autoridadnan a impone 571 multa y beslag di bestia.
E 25 inspectornan di Servicio Nacional di Inspeccion di Bienestar di Animal, un instancia independiente bou di Ministerio di Agricultura, Naturalesa y Calidad di cuminda, a atende cu un cantidad record di rapport aña pasa. Nan a topa cu tur cos for di infestacion di purga no trata y bestianan cu sobrepeso of demasiado flaco, te na casnan severamente contamina.
Mayoria informe ta bini di bisiñanan preocupa via number di telefon 144, pero profesionalnan manera veterinarionan tambe ta tuma contacto cu e instancia regularmente. Marc Jacobs, hefe di e servicio di inspeccion, a bisa RTL, “Nos ta mira un aumento grandi den e negligencia di bestianan di cas. Esaki ta mas notabel bou di cacho, pero mas ainda cerca pushinan neglisha.” Adicionalmente, tin informenan casi tur dia cu ta envolvi cabay, pony, djaca cu raton y conenchi.
Jacobs a atribui e aumento den negligencia parcialmente na efectonan persistente di e pandemia di COVID-19, ora hopi hende a adkiri bestia di cas. “Loke tambe nos ta mira fuertemente ta cu e gastonan di cuido di bestia, specialmente cuido veterinario, a subi. Pa motibo di e gastonan halto aki, hende no por paga tratamento mas. Esey ta conduci na aumento di negligencia, y despues cosnan ta bay malo.”
E trabou di e inspectornan ta carga riesgo. “No ta straño cu ora mi sali for di un cas, mi ta cubri cu purga. Bo mester tene hopi cuidao cu higiena,” Wilfred a bisa RTL. Jolanda a remarca, “Den e ultimo añanan, mi a mira tambe mas agrecion. Hende tin temperamento mas cortico.”
Inspectornan tin e autoridad di ofisialnan y supervisornan spesial di investigacion y ta interveni na varios manera. “Nos lo salba e bestia. Nos ta percura pa e yega cerca e veterinario. Y e doño tambe ta haya ayudo. Nos ta trece atencion riba esey,” Jolanda a splica.
Ora a puntr’e dicon nan ta haci e trabou aki, Wilfred a bisa RTL, “E ta un pasion. Mi a cuminsa den cuerpo polisial, pero consientemente mi a hasi e cambio aki.” Jolanda a bay di acuerdo: “Tur loke mi por haci pa mehora bienestar di bestia, mi ta hacie gustosamente.”
