Instagram ta expandiendo un prueba pa sconde con hopi “likes” hende su postnan ta ricibi, mientras cu ta purba combati e critica cu e conteonan ey ta afecta e salud mental y ta laga hende sinti malo ora di compara nan mes cu otronan.
E servicio pa comparti potret cu ta propiedad di Facebook, a bin ta haci e test na Canada for di mei. Awor, Facebook a bisa cu nan a expande e test pa Irlanda, Italia, Hapon, Australia, Brazil y New Zealand.
Facebook normalmente ta test e caracteristicanan nobo di Facebook y Instagram den mercadonan mas chikito prome cu ta trece nan pa Merca, si ta yega di trece mes. E compania no kier a comenta riba kico nan a saca afo for di e test na Canada of si tin plan pa expande esaki pa Merca pronto.
Un grupo cu por ta afecta pa esaki ta e “influencers,” e celebridadnan cu ta uza media social pa mercadea producto of influencia nan siguidonan. Despues di tur cos, si bo publica un potret y ningun hende ta ‘like it’ bo a publik’e mes?
Hende por wak ainda cuanto hende a ‘like’ nan mesun potretnan, pero no lo por wak e conteo pa otro hende su post. Na su luga, nan por tik pa wak un lista di tur e cuentanan cu a ‘like’ e otro posts, pero lo mester contanan manualmente. E ta un tarea cu poco hende lo kier haci. Di mesun manera, aunke Instagram no ta scondiendo e cantidad di siguido riba un cuenta, e ta rekeri un extra tik of dos pa haya sa esey.
“E ta hacie dificil pa haya ken e “influencers” ta,” Ryan Hilton, a bisa. E ta un Canades di 27 aña cu ta traha den media social y ta parti di e prueba di ‘no like’ pa lunanan. “Ta dificil pa sa ken pa sigui pasobra tur hende ta mustra mescos.” Hilton, kende tin un cuenta personal y un pa su cacho, cual e ultimo tin mas di 3.200 siguido, a añadi cu e ta compronde dicon Instagram ta haciendo esaki. Hilton a bisa cu su ruman muhe chikito, kende ta den ‘high school’, ta “obsesiona” cu ‘likes’.
“E ta mas tanto pa e generacionnan mas hoben, hende na ‘high school’ y eseynan” el a bisa. “Nan ta bou di hopi presion. Si un hende tin 1,000 ‘likes’ y un hende tin dos ‘likes’, esey probablemente ta bay laganan sinti no mucho bon.”
Mientras cu Hilton a bisa cu e cambio probablemente lo baha e poder di ‘influencers’ un poco, pero a indica cu hopi di e ‘influencers’ hoben awo ta uzando videonan live, no potretnan, pa lanta nan publico. Eynan, ainda e ‘likes’ ta visibel.
Guy Avigdor, co-fundador y Chief Operating Officer di e compania di mercadeo di ‘influencer’ Klear, a bisa cu hopi ta bayendo pa ‘Story’, e opcion di potret y video di Instagram cu ta disparce despues di 24 ora.
“Mas bien, aworaki ta e momento pa e industria adapta maneranan di midi mas adecua pa midi e impacto di e ‘influencer’ y baha e dependencia riba ‘likes’,” Avigdor a bisa.
