Mandatario di infrastructura a comparti cu prensa ayera mainta, cu mirando e situacion ‘manca’ unda no a construi casnan social e ultimo 8 aña, e mandatario ta lantando un instituto nobo banda di FCCA pa vivienda mas pagabel
Mirando cu tin un deficit di casnan social cual mandatario di asuntonan social, Glenbert Croes (MEP) a indica ta na un number halto di 2600, Otmar Oduber (POR) ta cerando acuerdonan cu partnernan pa construi cada aña 200 pa 250 cas. Pero si hasta logra cu e meta aki, e no lo yega na cura e deficit mirando cu den 4 aña lo por crea 1000 cas social so, segun e mandatario.
Mirando e situacion unda terenonan no tabata saliendo di parti di gobierno pa por construi casnan, mester a bay cumpra esaki por medio di companianan di real estate, cual no tabata percura pa e casnan ta na un prijs rasonabel y accesibel pa comunidad, segun sr. Oduber. “Mas cu claro e companianan ey no ta existi pa sirbi e necesidad di comunidad, si no pa gana placa y pa cumpli cu nan margen di negoshi.”
E situacion unda no tabatin casnan social accesibel na comunidad pa e ultimo añanan, hunto cu e disponibilidad pa cumpra casnan caro riba mercado di real estate di 250 pa 350 mil florin a trece un bashi hopi grandi pa loke ta trata grupo di persona cu podise a sali di un cas social.
E grupo di personanan cu a sali di cas social pasobra nan a logra haya un miho trabou despues di tempo, segun e mandatario ta hopi halto. “Personanan aki no ta cuadra na e tipo di casnan social cu tin actualmente, p’esey nos ta trahando riba un instituto banda di FCCA cu por brinda un sosten pa nan.” “Hopi biaha un mama soltero cu tin un bon trabou no por cumpra un cas of no por yega na remarca pa un financiamento pa un cas di 350 mil mas o menos, pero tampoco bo kier pone den un bario problematico, pasobra e ta crea un tipo di degeneracion y bo ta baha su calidad di bida. Di otro banda, tin hopi cu a sali di e situacion dificil ora a drenta un cas social, pero ainda ta biba ey.”
Instituto nobo cla pa mei
Un organisacion estilo di FCCA, ‘probablemente’ lo wordo anuncia pa mei proximo. Mirando cu segun e mandatario tin bastante reunion tumando luga riba e topico aki, nan ta spera di concretisa esaki poco mas pa fin di luna di maart.
