(NLTimes) – Instancianan di inteligencia di Hulanda a confirma dialuna cu hackernan estatal Ruso ta purba di haya acceso na apps di combersacion Signal y cuentanan di WhatsApp rond mundo, incluyendo esnan di oficialnan di gobierno Hulandes, personal militar y otro individuonan di interes manera periodistanan. Segun informe, Signal ta particularmente un blanco pa motibo di su reputacion fuerte como un plataforma di comunicacion sigur cu gobiernonan ta usa.

Servicio General di Inteligencia y Seguridad Hulandes (AIVD) y Servicio di Inteligencia y Seguridad Militar (MIVD) a bisa cu e hackernan ta purba di obtene verificacion y codigonan PIN door di imita chatbotnan di sosten di Signal.

Unabes cu logra haya acceso, e atakantenan por lesa mensahenan manda na e cuenta y participa den gruponan di combersacion sin conocemento di e usuario. Hackernan tambe ta explota funcionnan cu ta permiti aparatonan pa ser conecta na cuentanan, loke por permiti vigilancia remoto.

Director-General di AIVD Simone Smit a enfatisa cu e menasa ta dirigi riba cuentanan individual enbes di vulnerabilidadnan tecnico den e plataformanan di mensahe mes. “No ta asina cu Signal of WhatsApp como apps ta comprometi. E menasa ta dirigi riba cuentanan di usuarionan individual,” el a bisa den un declaracion.

Vice Almirante Peter Reesink, director di MIVD, a adverti cu a pesar di encripcion di punta pa punta, aplicacionnan di combersacion manera Signal y WhatsApp no ​​ta adecua pa informacion clasifica of sensitivo. Pa proteha contra intentonan di hacking Ruso, AIVD y MIVD a emiti un conseho cibernetico pa usuarionan.

E conseho ta recomenda pa usuarionan controla combersacionnan di grupo pa cuentanan sospechoso of duplica, verifica cualkier cuenta inusual pa medio di email of telefon, y raporta preocupacionnan na e team di seguridad di IT di nan organisacion. Cuentanan comprometi mester ser kita for di combersacionnan di grupo.

E ta adverti tambe cu atakantenan por cambia nomber di cuentanan secuestra—por ehempel, pa “cuenta elimina”—pa evita deteccion. Cuentanan no-legitimo cu ta drenta un grupo via un link di grupo captura mester ser kita door di e administrador di grupo.

Si un administrador di grupo ta parce comprometi, miembronan ta ser conseha pa bandona e grupo y crea uno nobo.