(AP) — Lionel Messi y Cristiano Ronaldo ta bay enfrenta otro na Saudi Arabia finalmente. Inter Miami a confirma ayera cu ta bay participa den e Riyadh Season Cup – algo cu a keda anuncia pa oficialnan Saudi dia 21 di november ultimo. E tempo aya, Inter Miami a bisa cu e informacion no tabata corecto.

Inter Miami ta bay enfrenta Al-Hilal dia 29 di januari, y Al Nassr – team di Ronaldo – dia 1 di februari. E dos club aki ta lidera e Liga Profesional Saudi, y Ronaldo ta e goleador lider den e liga aki.

“E partidonan aki ta bay ofrece testnan importante pa nos team, cu ta bay beneficia nos mientras nos ta acercando e temporada nobo,” director di deporte di Inter Miami, Chris Henderson a bisa. “Nos ta emociona pa nos grupo haya e chens pa enfrenta teamnan cu asina bon calidad manera Al-Hilal y Al Nassr.”

Messi y Ronaldo a enfrenta otro 35 biaha entre partidonan pa club y pais, Inter Miami a bisa, cu e team di Messi ganando 16, team di Ronaldo ganando 10, y e bandanan conformando cu un empate e otro nuebe ocasion. Messi tin 21 gol y 12 asistencia den e partidonan aki; Ronaldo tin 20 gol y un asistencia.

Messi a promove turismo na Saudi Arabia y na mei a keda suspendi pa su club anterior, Paris Saint-Germain, pa haci un biahe no autorisa na e pais. E tambe a hunga den e Riyadh Season Cup e aña aki, ora PSG tabata e team invitado.

Saudi Arabia a haci un empuhe mayor pa ta un actor grandi den mundo di futbol door di contrata algun di e hungadornan mas grandi di e wega, memey di acusacionnan di “sportswashing” – un practica unda ta usa deporte pa mehora reputacionnan daña di un pais, individuo, grupo, corporacion of gobierno.

Pero esaki no a logra atrae Messi na e reino rico den petroleo ora cu el a bandona PSG fin di ultimo temporada, y e ocho-biaha ganador di Ballon d’Or a opta pa bay e Major League Soccer Mericano na su lugar.

Messi y Ronaldo ta considera ampliamente como dos di e hungadornan mas grandi den historia, y a competi contra otro pa e premionan mas grandi den futbol durante nan miho añanan na Barcelona y Real Madrid, respectivamente.

Inter Miami awo tin cuatro partido pre-temporada anuncia, cu uno contra team nacional di El Salvador dia 19 di januari y un partido contra un team di hungadornan top na Hong Kong dia 4 di februari.
Ta spera cu e schedule di MLS ta bay cuminsa fin di februari.